Guwahati, Jymmang:
U Myntri Rangbah ka Assam u Himanta Biswa Sarma u la pynbna ba ka Guwahati kan sa mih shen kum ka jaka pdiang sngewbha ha ka pyrthei, ha kaba ki don 11 tylli ki 5-Star Hotel kiba dang pyntrei mynta ban pyndap ïa ka jingdawa kaba nang kiew jong kane ka thaiñ.
Ha ka jingkren sha ki lad pathai khubor ha ka lah sngi U Blei hadien ba la pyndep ïa ka jinglehniam bhoomi poojan na ka bynta ar tylli ki jaka jong ka Marriott International kiba dang wan, u Sarma u la batai ïa ki kum ki jingpynrung “ba kyrpang bad bapher” ha ka jaka pdiang sngewbha jong ka nongbah.
U la pynpaw shuh shuh ba ar tylli ki hotel Taj la thmu na ka bynta ka projek Guwahati Aerocity, katba kawei ka Lemon Tree Hotel ka dang shna ha shilynter ka surok bah National Highway.
U Sarma, u la pynthikna ruh ïa ka jingpynheh ïa ka Radisson Blu Hotel, kaba la don lypa, ha kaba kan ïoh sa 100 tylli ki kamra.
Ha Khanapara, ka Taj Hotel kaba thymmai, kan bujli ïa ka Vivanta kaba mynta, bad sa saw tylli ki Marriott Hotel, ki don ruh ha ka Card na ka bynta ka Guwahati.
Haba ïasam ïa ki khubor ba thymmai ha ki Social Media, u Sarma u la pynpaw ba ïa ki soskular (MoU) na ka bynta kine ki projek kiba rem dor bha, kiba la antad ba kan kot sha ka 500 klur tyngka, la ïasoi ha ka jingïalang jong ka Advantage Assam Infrastructure and Investment Summit kaba la long ha u bnai Rymphang.
Ka jingtei ka la dep sdang tang hapoh lai bnai naduh ba la ïateh kular.
