Shillong, Jymmang 15
Kum shi bynta ban ïarap ïa ki pulit pynïaid kali ba kin ïoh rieh na u slap bad ka lyer, u Bah Sanbor Shullai, MLA ka South Shillong Konstitwensi ha ka Sngi Palei, u la plie paidbah ïa ka Traffic Booth ha Laban Red Cross kaba la tei na ka Discretionary Grant u MLA.
Ïa kane ka Police Booth kaba la tei ha ka jinglut kaba la kot T.1.30 lak, u Bah Sanbor hadien ba u la dep ban plie, u la aiti syndon sha ka Shillong Traffic Police ban pyndonkam, ha kaba ïa u shabi la aiti sha u Superintendent of Police (Traffic) ka East Khasi Hills u K Prasad uba la ïadon lang ha kane ka sngi.
Haba kren ha ka jingïalang lyngkot shwa ban aiti, u Bah Sanbor u la ong ka jingtei ïa ka Police Booth ka dei hadien ka jingud jingnam jong ki paidbah bad khamtam ba kane ka thaiñ ka dei kaba bun palat ki kali ba ïaid ba ïeng bad ruh ki nongleit nongwan bad kaba don ïa ki jaka pule, jaka sumar bad ka ïew ka hat.
U la ong, kane ka booth kan ïarap ïa ki pulit Traffic ba kin lah ban khmih bad pynïaid ryntih bad pynïaid beit ïa ka jingïaid jong ki kali ha kane ka jaka.
Ha kane ka sngi la ïoh ruh ka jingkren na u SP Traffic u K Prasad uba la pynpaw ka jingsngewnguh bad ai khublei ïa u MLA uba la pyrkhat na ka bynta ki pulit pynïaid kali bad u la ong ba kan long shisha ka jingïarap kaba khraw bha.
Hadien kane, u Bah Sanbor Shullai u la plie sa ïa ka jaka leit shabar ne ka Use and Pay Toilet kaba la tei da ka Shillong Municipal Board lyngba ka Swacch Bharat Mission ha ka jinglut kaba la kot sha ka T.5 lak. Haba ai jingkren hangne, u la ong ba kum u nongmihkhmat u sngewthuh ïa ki jingdonkam bad khamtam lei ba kane ka jaka ka dei kaba bun ki dukan, ki nongkamai kali bad ki nongleit nongwan, kane ka jaka leit shabar kan ïarap shibun bad pyllait ruh na ka jingleit pathar. U la kyntu ruh ba kin sumar bad leh khuid ïa kane ka jaka, namar kan dei hi ka jingdonkam ka jong ki, kaba manla ka sngi.
