Khliehriat, Jymmang 15
Haduh 800 ngut ki khynnah skul na 13 tylli ki Higher Secondary School hapoh ka East Jaiñtia Hills District ki la ïohpdiang ïa ki tablet (M-TABs) hapoh ka skhim pule digital jong u Myntri Rangbah ka Jylla.
Ïa kine ki tablet ne M-Tabs la sam da u Myntri ka Sorkar Jylla bad MLA ka Khliehriat Ma Kyrmen Shylla bad MLA ka Sutnga-Saipung Kong Santa Mary Shylla ha ka jingïalang kaba la long ha Khliehriat West Community Hall, Khliehriat ha ka 15 tarik Jymmang.
Ka jingsam ïa ki tablet ka long shi bynta jong ka jingpyrshang jong ka Sorkar ban pynkupbor ïa ki khynnah skul da ki digital aids na ka bynta ki jingdonkam ha ka pule puthi jong ki manla ka sngi.
Ïa ki tablet la pyndap lypa da ki jinghikai kiba la pynbeit katkum ki jingdonkam jong ki khynnah ha ka kyrdan Higher Secondary School jong ka Arts, Science bad Commerce.
U Ma Kyrmen Shylla ha ka jingkren u la pynpaw ïa ki sienjam ba la shim da ka Sorkar na ka por sha ka por na ka bynta ka bha ka miat jong ki nongshong shnong ha kylleng ka jylla ha ki bynta bapher bapher kynthup ïa ka pule puthi, ka koit ka khiah, bad kiwei kiwei. Nangta u la pynshlur ruh ïa ki samla pule ban don ïa ki jingpyrkhat kiba bha bad u la ban jur ruh ba ka jingtrei shitom bad ka jingaiti lut ka long u shabi jong ka jingjop.
U Ma Kyrmen u la kren ruh halor ka bynta kaba kongsan kaba ki kmie ki kpa ki don ha kaba thaw dur ïa ka lawei jong ki khynnah da kaba u pynshlur ruh ïa ki samla pule ban pyndonkam hok ïa ki lad ki lynti kiba la pynbiang na ka bynta jong ki khnang ban lah ban leh bha ha ka pule puthi bad ha ki kam ki jam jong ki ha ki sngi ki por ban wan.
Shwa kane, kum kane ka juh ka jingïalang, ka MLA ka Sutnga-Saipung Kong Santa Mary Shylla ka la sam ïa ki tablet sha ki khynnah skul ha ka jingïadon lang u Deputy Commissioner, East Jaiñtia Hills District, u Shivansh Awasthi, u Additional Deputy Commissioner, u Gautam Warjri nalor kiwei kiwei ki heh Sorkar, ki khynnah skul bad ki nonghikai.
Ha ka jingkren ka Kong Santa Mary Shylla haba ïathuh ïa ka jingïakynduh shimet jong ka na ka jingïalang jong ka Artificial Intelligence (AI) ha Belgium, ka la ban jur ïa ka jingdonkam jong ka jingpule digital da kaba pynpaw ïa ka bynta kaba nangroi jong ka teknoloji ha ka liang ka pule puthi da kaba ka la ai jingmut ïa ki samla pule ban pyndonkam ïa ka teknoloji da ka jingkitkhlieh na ka bynta ka jingroi jingpar jong ki ha ka jingpule bad ka lawei.
Ka Kong Shylla ka la pynpaw ruh ïa ka jingkyrmen ba ki lad jingïarap digital kiba la pynbiang kin pynsuk ïa ki samla pule ban ïoh ïa ki jingtip kiba donkam na ka bynta ka jingpule jong ki da kaba ka shim ruh ïa ka kabu ban pynpaw biang ïa ka bynta kaba kongsan ba la leh da ki samla pule ha kaba thaw dur ïa ka lawei jong ka jylla bad ka la pynshlur ïa ki ban bteng ban trei shitom ha la ki jong ki jong ki jingpule ban ïoh ïa ka lawei kaba phyrnai.
Katba u Deputy Commissioner ka East Jaiñtia Hills District, u Shivansh Awasthi u la pynpaw ba ka jingthmu ban sam ïa ki tablet sha ki samla pule ka pyni ïa ka jingthmu bad ka jingangnud jong ka Sorkar bad ka jingsam ïa ki tablet ym dei tang na ka bynta ki jinghikai hynrei ki dei ruh na ka bynta ban hikai ïa ki jingtbit bapher bapher kiba lah ruh ban ïarap ïa ki samla pule ban ïoh ïa ki jingtip kiba ïadei bad ki lad kamai bapher bapher da kaba u la kyntu ïa ki samla pule ban pyndonkam ïa ki tablet ha ka rukom kaba seisoh da kaba u kdew ruh shaphang ki jingma kiba lah ban mih na ki social media.
Shuh shuh, u la kren bniah ruh halor ki jingïarap bapher bapher ba la shim da ki bor synshar District ban kyntiew ïa ka tnat pule puthi ha East Jaiñtia Hills District lyngba ka DMF Funds kaba kynthup ïa ka jingbuh ïa ki smart classrooms bad ka jingpynlong ïa ki prokram ai jinghikai ïa ki khynnah skul jong ka District.
