Shillong, Jymmang 15
Ka Delhi Capitals ka la wanrah ïa u rangïalehkai na Bangladesh u Mustafizur Rahman na ka bynta ban mih bujli ha ka jaka u Jake Fraser-McGurk, uba la weng noh ïalade na ki jingïalehkai kiba dang sah jong ka samoi ïalehkai namar ki daw shimet. U Mustafizur u la don mynshwa bad ka DC ha ka samoi ïalehkai 2022 bad 2023.
Na ka liang ka Bangladesh Cricket Board ka la ïathuh ba ym pat ïoh kano kano ka jingkyrpad ban ïoh ïa ka No-Objection Certificate (NOC) na ka bynta u Mustafizur haduh mynta. Utei u rangïalehkai ba stet bha u dei shi bynta na ka kynhun ïalehkai jong ka Bangladesh kaba la thmu ban leit sha UAE mynta ka janmiet, ha kaba kin ïakhun pyrshah ïa katei ka ri ha ki ar tylli ki jingïalehkai T20I ha ka 17 bad 19 tarik mynta u bnai.
“Ngam lah ban ong (la u Mustafiz un rung ne em sha ka Delhi Capitals),” la ong u CEO ka BCB, u Nizamuddin Chowdhury. “U don bad ka kynhun ban leit sha UAE, ngim pat ïoh kano kano ka rai ban leit ïasoh bad ka Delhi Capitals.”
Une u rangïalehkai ba sted jong ka Bangladesh u don ïa ka jingshemphang kaba biang bha ha ka IPL. U la don bynta ban pynjop ïa ka nam lahduh bad ka Sunrisers Hyderabad ha ka samoi ïalehkai ba nyngkong jong u ha u snem 2016, ha kaba u la ïoh ban shim 16 wiket ha ka jingïalehkai bad long u rangïalehkai ba nyngkong bad tang ma u na shabar ri ban ïohpdiang ïa ka khusnam rangïalehkai ba dang khie dang san. U la shim 61 wiket ha 57 tylli ki jingïalehkai IPL baroh, ha kaba u la mihkhmat ïa ka MI, DC, RR bad CSK ha kine ki snem. U ïasoh bad ka DC mynta na ka bynta ka jingsiew kaba 6 klur.
U Mustafizur un dei u nongïalehkai ba lai na ka bynta ka Delhi Capitals, kaba don ruh ïa u Mitchell Starc bad u T Natarajan. Ka DC ka dang don hapdeng ka jingpyrshang ban ïoh rung sha ka playoff jong ka IPL 2025, ha kaba kane ka lympung kan bteng biang ha ka 17 tarik mynta u bnai.
