Washington, Jymmang:
U President ka US, Donald Trump, ha ka Sngi Ba-ar u la ong ba ka Iran ka long ka ri nongpynjot ba shyrkhei tam ha Middle East bad kumta kam don hok ban ioh ia ki tiar thma ‘Nuclear’ da lei-lei ruh bad da kane, u la pynbna ba ka US kan ym ailad da lei-lei ruh ia ka Iran ba kan don ia ki tiar ‘Nuclear’.
Haba ai ïa kaei kaba u la batai kum ka jingmaham kaba khatduh bad ka jingplie lynti kaba lah ban wanrah ia ka jingïadei bad ka jingiatreilang hapdeng kitei ki ri, u Trump u la ong ba ka Iran ka don ka kabu ban dang bteng ia “ki jingkulmar bad ki kam thombor” jong ka bad ka don ruh ka lad ba kan pdiang noh ïa ka lynti sha ka jingsuk.
Namar ka Iran ka la kyntait bunsien ïa ki jingkynnoh ba ka long ka nongthaw jingkulmar ïa ka shongsuk- shongsaiñ ha ka thaiñ Middle East.
U Trump u la ong ba ka US ka kloi ban ïasoi ïa ka soskular kaba thymmai bad ka Islamic Republic hynrei tang lada ki nongïalam jong ka ki pynkylla noh ia ki jing-iakut ha ka rukom kaba biang.
“Nga kwah ban iateh bad ka Iran”, u la ong. “Hynrei lada ki nongïalam jong ka Iran kin kyntait ïa kane ka tnat olib…, ngin ym don lad shuh hynrei ban pynlong ïa ka jingpynbor kaba jur bha.”
Haba kren ha ka jingialang jong ki nongbei tyngka ha ka nongbah Riyadh jong ka Saudi Arabia, U Trump u la maham ba “ka Iran kan nym ioh satia ban buh ia ki tiar nuclear”, bad ong ruh ba ka jingtyrwa jong u ia ka jingiateh kan nym long kaba neh bad treikam baroh shyrta.
Namar u Trump u ju ong ruh na ka por sha ka por, ba ka Iran ka long ka nongbuh jingma ia ka thaiñ Middle East bad ia ka pyrthei baroh kawei, lada katei ka ri kan ioh ban buh ia ki tiar ‘Nuclear’ bad ki tiar thma kiba khlaiñ bor bad ka lah ruh ban leit tur bad thombor wat ia ki paramarjan kiba ju kyrshan ia ka man ka por ruh.
