Delhi, Jymmang 15
U Myntri Rangbahduh ka Ri, Narendra Modi, u la pynkylla ïa ka polisi jong ka India pyrshah ïa ki kam lehnoh kaba ong ba kano-kano ka jinghiar thma ïa ka khyndew ka shyiap jong ka India yn ñiew kum ka kam thma, la ong u Rajnath Singh, Myntri ka Sorkar Pdeng ba khmih ïa ka tnat Ïada Ri haba ai jingkren sha ki shipai ba shlur jong ka Indian Army ha Badami Bagh Cantt, Srinagar ha ka sngi Palei.
U la ban jur ba ka India ka buh hakhmat eh ïa ka shongsuk shongsaiñ bad kam ju kyrshan ïa ka thma, hynrei haba la thombor ïa ka bor synshar jong ka, ka long kaba donkam ban jubab. Lada ka Pakistan ka dang bteng ban kyrshan ïa ki kam lehnoh, kan mad ka jingeh kaba khraw, u la ong.
U Rajnath Singh u la khot ïa ka ‘Operation Sindoor’ kum ka sienjam kaba khraw tam kaba la shim da ka India pyrshah ïa ki kam lehnoh ha ka histori, bad ka dak jong ka jingkut jingmut jong ka ri ban leh da kaba tyngeh ban pynduh ïa ka jingma.
“Ka Operation Sindoor ka dei ka jingkut jingmut kaba la pyni da ka India kaba ym dei tang ka jingpyni ïa ka kam ïada ri, hynrei ban shim ïa ki rai kiba shlur ha kano-kano ka por ba donkam. Ka la long ka jingangnud jong uwei-pa-uwei u shipai ba ngin poi sha manla ki jaka rieh jong ki lehnoh bad ban pynduh pyndam ïa ki. Ki lehnoh ki la pynïap ïa ki nong India katkum ka niam jong ki, ngi la pynïap ïa ki namar ki kam jong ki. Ka dei ka dharma jong ngi ban pynduh jait ïa ki. Ki shipai jong ngi ki la leh ïa kaba dei ïa ka jingbitar jong ki bad ki la siew kylliang ïa ka Pahalgam da ka jingshlur & jingstad kaba khraw”, u la ong.
U Myntri ïada ri u la bynrap ba ka Operation Sindoor ka la phah ïa ka khubor kaba jam bad kaba shai sha ki seng lehnoh kiba rieh ha Pakistan bad ki kynrad jong ki, ba kim don jingshngaiñ hangno-hangno ruh. “Ki shipai jong ngi ki la pyni sha ka pyrthei ba ka jingthmu jong ki ka long kaba thikna bad ïa ka kam ban kheiñ la iehnoh ha ki nongshun”, u la ong.
U Rajnath Singh u la bynrap ba ïa ka jingkut jingmut ba khlem artatien jong ka India pyrshah ïa ki kam lehnoh lah ban peit bniah na ka jingshisha ba kam shym la shah pynthut ha ka jingbyrngem ‘nuclear’ jong ka Pakistan, da kaba kdew ba ka pyrthei ka la sakhi haduh katno ka jingbym kitkhlieh ka Islamabad ka la pynmih ïa ki jingbyrngem nuclear ïa ka New Delhi bunsien. “Nga buh ïa kane ka jingkylli hakhmat ka pyrthei: Hato ki tiar nuclear ki long kiba shngaiñ ha ka kti jong kum kane ka ri kaba khlem jingkitkhlieh bad kaba leh thok? Ïa ki tiar nuclear jong ka Pakistan dei ban shim hapoh ka jingpeit jong ka International Atomic Energy Agency (IAEA),” u la ong.
U Rajnath Singh u la pynpaw ba lyngba ka jingjia ha Pahalgam, la pyrshang ban pynpra ïa ka jingïatylli ha ka imlang sahlang jong ka ri India, bad ki shipai ki la jubab ïa kane ka jingthombor da kaba siat ïa ka mynsiem jong u nongshun. U la pynkynmaw ïa ka jingpynbna jong ka Pakistan kumba 21 snem mynshwa hakhmat u Myntri Rangbahduh ha katei ka por (L)) Atal Bihari Vajpayee ba yn nym kyrshan shuh ïa ki kam lehnoh na ka khyndew ka shyiap jong ka. U Myntri Iada ri u la ong ba ka Pakistan ka la thok ïa ka India, bad ka dei ban sangeh noh ban ai jaka rieh ïa ki seng pyrshah ïa ka India bad ki seng lehnoh & ban ym ailad ïa ki jaka jong ka ban pyndonkam pyrshah ïa ka India, u la ong.
U Rajnath Singh u la pynskhem biang ba ym dei ban leh ïa kino kino ki kam bym don nongrim na shiliang pud, kaba long ka nongrim jong ka jingïasngewthuh jingmut kaba don hapdeng kine ki ar tylli ki ri. U la pynpaw biang ïa ki jingmut jong u Modi ba ki kam lehnoh & ki jingïakren kim lah ban ïaid lang, bad lada ki don ki jingïakren kan long tang halor ki kam lehnoh bad ka PoK.
U Rajnath Singh u la pynpaw ka jingsngewnguh ïa ki shipai kiba shlur kiba la pynpra ïa ki post & bunker jong ka Pakistan ba don sha shiliang pud, kaba la phah ïa ka khubor kaba shai sha ki nongshun. “Nga wan shane mynta ka sngi ryngkat bad ka khubor na ki paidbah jong ka ri: ‘Ngi sngew sarong ïa ki Shipai jong ngi’,” u la bynrap.
Katba u Myntri u la ïaroh ïa ka jingshlur bad ka jingaiti lut jong ki shipai, u la pynpaw biang ïa ka jingkular jong ka Sorkar ban bteng ban pynbiang ïa ki shipai da ki tiar ïaleh bad ki jaka treikam ba bit ba biang bad ki jingdon jingem katkum ka juk mynta.
