Babu Kular Khongjirem
Katba nang ïaid ka juk, katta ka la nang kylla sted bad kata ruh, ka kylla da khongpong lut baroh. Kane ka dei shisha ka kuli juk kaba ïapher shisha bak-ly-bak na ka sotti juk kaba ki im hok im sot ha ki por mynshwa.
Lada peit ïa ki kam bad jingleh ki briew mynta, ngi shem ba ki kham tbit ban thok bad shukor bad ban kham triem bha ruh ban kamai thok. Ki briew ki kheiñ triem bha bad ki kham burom ïap burom im bha ruh lada phi kham triem ban thok bad shukor. Lada phim nang ban leh thok bad bam klop, kata, kin treh burom bad ñiew kor shuh ïaphi.
Hynrei, lada phi leh hok bad leh ‘riew Blei te, phin shah kyntait ei sha kyndong kynshrot bad ym don ba kheiñ briew kheiñ snep shuh ïaphi.
Mynshwa, ki briew ki burom ïa kiba leh rit bad kiba don akor don burom. Mynta pat, lada phim nang ban leh heh leh meng, leh khraw bad sarong, ki briew kim salia bad kim kheiñ snep satia ïaphi.
Mynshwa ki kheiñ ‘riewkai bad ‘men aiksuid’ ïa kiba khi ne khap lai nuid. Mynta pat, lada phim nang ban khi ne khap bun nuid ïa u shñiuh khlieh, kin kheiñ kum ki ‘riew dum bad ki juk maw. Mynshwa, ki briew ki lehraiñ ban phong ki sopti ne patlun kiba jot kiba pei khamtam ha ki jaka ïew jaka hat ne ki jaka ba bun paidbah kum ha ïewduh ne Khyndailad (Police Bazar). Mynta pat, lada phim pat nang ban phong ïa ki sopti ne patlun kaba la pynpei thliew lut naduh khohwah ter ter wat haduh lbong ruh, kin ong ba phim pat long satia uta/kata ka ‘riew standard ne kaba la tbit ban leh style.
Ynnai ïakren shuh ïa ka akor ka burom namar kim salia bad kim kheiñ snep shuh ïa ka. Lada phi leh don akor marwei, phin shu shah sin kum ki ‘riew daini. Ka ktien ki nang ban kren da ki ktien jali-ja um suda, ki kam pat sha khlaw sha btap. Ka ktien ki nang ban kren kaba thiang kum ka um ngap, ki kam pat kiba sat kum u soh mynken beb. Kat shaba phai kat sha leit, ki buit kyllaiñ bad soitan suda. Lada phi shong ruh jhieh, lada phi ïeng ruh kynduh. Kata ka dei ka pyrthei bad ka juk ba phi im bad ïakynduh mynta ki por.
Wat lada kat kata ka juk ruh, hynrei dang don hi khyndiat khynsoit kiba dang im hok, leh tip briew tip blei, leh tip kur tip kha, kiba dang kamai ïa ka Hok ka Shikyntien bad kiba dang tieng bad lehraiñ ïa U Blei. Kine ki khyndiat ngut ki dei ban im da kaba ‘siañ kum ki bseiñ bad jem nud kum ki paro, lada shida than ka ban ïap namar kin shim kabu ïa ka jinglong hok bad shisur jong phi. Kane ka im suk bad kamai suk ruh ka ban poi sha ka ma. Ka pisa ïoh ei, ka pisa kamai suk bad ka pisa thok pisa shukor kaba shet kylla bad pynkulmar lut ïa kane ka pyrthei haduh katne, kaba la pynjot, pynlamwir bad wanrah ïa ka apot sepsngi ha kane ka juk jong ngi mynta. Kiba la mad ïa kane, ki ong, kim lah kiar ne pyllait shuh junom la junom kajuh hi la kum ki nongdih drok mynta.
