Shillong, Jymmang 15
Ka lympung ïalehkai Khelo India Youth Games 2025 ka la poi sha kaba kut ha ka sngi Palei ha Bihar ha kaba ka Maharashtra ka la long kum ka lahduh da kaba ïoh haduh 158 tylli ki takma.
Kine ki kynthup ïa 58 tylli ki takma ksiar bad 47 tylli ki rupa. Ka Haryana ka la wan ha ka kyrdan ba-ar da kaba ïoh 117 tylli ki takma (39 ksiar & 27 rupa). Ka Rajasthan ka la wan balai ryngkat 60 tylli ki takma (24 ksiar bad 12 rupa).
Ha kane ka sngi kaba khatduh la sakhi ïa ki jingïalehkai final ha ka basketball, fencing bad weightlifting.
Ha ka phainal basketball jong ki shynrang, ka Uttar Pradesh ka la pynliem ïa ka Rajasthan na ka bynta ban ïoh ïa ka takma ksiar. Ha ka jingïalehkai jong ki kynthei, ka Karnataka ka la pynliem ïa ka Haryana ban ïoh ïa ka takma ksiar.
Ha kane ka 7th Khelo India Youth Games la sakhi ruh ïa ki jingïalehkai bha ka Haryana ha ka jingïalehkai fencing. Te kumta ka Haryana ka la ïoh ban khur ïa ka takma ksiar ha baroh lai tylli ki phainal ba la long hynne ka sngi. Ha baroh kawei jong kane ka jingïalehkai fencing, ka Haryana ka la khur 7 tylli ki takma ksiar, 2 tylli rupa, bad 3 tylli rnong, kaba pynshisha ïa ka jingtbit kane ka jylla ha katei ka jingïalehkai.
Ha kane ka lympung la sakhi ïa ki katto katne ki rekod ba la lah ban thaw. Ki don bun kiba la lah ban pynpra ïa ki rekod. Ha ka jingïamareh kaba 400 meter, u Kadir Khan na Uttar Pradesh, bad ha ka jingïamareh 100 meter u Aditya Pisale na Maharashtra, ki la thaw ïa ki rekod ba thymmai ban long ki nongmareh kiba sted tam jong ka Khelo India Games.
Haba phai sha ka Meghalaya ka la khur tang ar tylli ki takma rnong lyngba ka jingïalehkai phutbol bad siatkhnam.
Ka jingïoh ka Jylla ïa katei ka takma ha ka phutbol ka la wan hadien ba ka la mad ïa ka jingshah rem ha ka Jharkhand da 2-1 kol ha ka jingïakhun semi final kaba la long ha ka lah sngi U Blei ha Begusarai, Bihar.
Wat la kane ka kynhun hapoh ka jingïalam u Bah Jeffrey Warlarpih (football coach) ka la khur ïa ka takma ksiar mynshem snem, hynrei mynta ka kynti kam shym la ïoh ïa ka jingjop ha ka jingïakhun semi final.
Kumba ka paw ka kynhun ïalehkai phutbol ka Jylla ka la khur ar sien ïa ka takma rnong bad kaba nyngkong ka dei ha u snem 2023.
Ka Meghalaya ka la khur ïa ka takma rnong ha ka jingïakop siatkhnam lyngba u Devraj Mohapatra ha ka Recurve hadien ba u la jop ïa u Vishu na Uttar Pradesh ha ka taïew ba la lah.
Napdeng ki 10 tylli ki jait jingïalehkai kiba ka Meghalaya ka la phah, tang ka football bad archery ka la ïoh takma, katba kiwei ki jingïalehkai kum ka Athletics, Badminton, Boxing, Cycling, Gymnastics, Judo, Shooting bad ka Swimming kim pat shym la lah ban pynurlong na ka bynta ka Jylla.
