Shillong, Jymmang 15
Ka Meghalaya ka la long kum ka lahduh ha ka NECDC Senior Men’s Interstate Friendship Tournament 2025, hadien ba ka la pynliem noh ïa ka Nagaland da 110 run ha ka jingïakhun phainal ha ka sngi Palei ha Sovima kaba ha Nagaland.
Ka Meghalaya hadien ba la jop kynting pisa ka la jied shwa ban tied nyngkong. Ka jinglah tied ïa ka shiteng spah run na u Arpit Bhatewara bad u Jaskirat Singh Sachdeva ka la pynlong ban kynjoh sha ka 230 run bad shah pynhap 7 wiket ha ki 50 over. Katba ka Nagaland ka la mad ïa ka jingduh noh ïa ki katto katne tylli ki wiket kaba ha sdang hynrei ka la ïakhun tyngeh na ka bynta ban kynjoh sha 120 run ha ki 34.3 over.
Ïa kane ka lympung ïalehkai la pynlong da ka Nagaland Cricket Association hapoh ka jingkhmih jong ka North East Cricket Development Council. Ka jingthmu jong kane ka long ban ïarap ïa ki jylla jong ka thaiñ shatei lammihngi ba kin long ba la khreh na ka bynta ki lympung ïalehkai ka BCCI 2025-26 ki ban sa long shen.
Kumba ka paw ka Nagaland ka la rah ïa ka nam lahduh ar sien ha kane ka lympung ha ki ar snem ba la lah, katba ka Meghalaya kam shym la lah satia ban ïaid shakhmat sha ka kyrdan semi-final na ka daw ka jingshah pynthut ha ki bor ka mariang.
Kane ka jingjop ka la long ka jingbteng jong ka Jylla ban nangkiew shaphrang bad dangshen ka kynhun ki ‘thei ïalehkai ka Meghalaya ka la rah ïa ka nam lahduh ha ka NECDC Senior Women Tournament 2025 ha Sikkim.
U Arpit u la khyrwit ïa ka shiteng spah run kaba lai ha kane ka lympung bad ka jinglah ban tied 72 run na ki 113 bol ka dei kaba heh tam haduh mynta. Une u rangïalehkai u la ïoh ïa ka jingkyrshan na u Swastic Chettri (43 run na ki 83 bol) ha kaba ki la ïatied lang 73 ron ha shwa ban shah pynhap ka wiket ba ar.
Hadien ba u Swastic u la ‘run out’ bud sa ka jingshah pynkhyllem noh u Lerry Sangma hadien ba u la ïoh da ka ‘duck’, u Arpit u la lah ban bynrap sa 92 ron ryngkat bad u Jaskirat Singh Sachdeva (55 run na ki 57 bol), uba la sdang ban tied kham bun. Ka jingïalehkai bha u Akash K Choudhary (24 run na ki 18 bol) bad u Ram Gurung (not out 16 run na ki 10 bol) ka la pynlong ïa ka Meghalaya ban ïoh 230 run bad shah pynhap 7 wiket.
Ka Meghalaya kaba la jop kham ha shwa ïa ka Nagaland ha ka jingïakhun kaba nyngkong jong kane ka lympung ha ka jingïalehkai group, hynrei kata ka jingïalehkai ka la shah pynthud ha u slap. Mynta ka sngi kam shym la don kano-kano ka jingeh, hynrei ki rangïalehkai ka Nagaland ki la shah khanglad ha ki nongkawang bol ka Meghalaya.
U Abhishek Kumar u la lah ban pynkhyllem ïa lai ngut napdeng saw ngut ki nongtied kiba kynsai bad u Akash u la lah ban pynhap 2 wiket bad ha kaba kut ka la mad ïa ka jingshah rem.
Ha kane ka jingïakhun final la don lang u Myntri Rangbah ka Nagaland u Neiphiu Rio, uba long u Convener ka NECDC, kumjuh u Co-Convener bad uba long u President ka Meghalaya Cricket Association u Nababrata Bhattacharjee, u dkhot jong ka BCCI u MKJ Mazumdar bad kiwei kiwei.
