Nongpoh, Jymmang 15
Wat la jan man ka sngi la sakhi ïa ki kam tuh kam thiem kiba bunjait hynrei mynta la mih sa ki nongtuh um, kiba tuh ïa ka um da kaba pynpei ïa ki pipe um jong ka tnat PHE ban ïa pyndap tuh ha la ki ïing ki sem.
Kane ka jingjia jong ka jingshah tuh um jong ka tnat PHE ka la wanrah bad pynlong ïa ki nongshong shnong jong ka sor Nongpoh ban mad ka jingtyrkhong bad jingduh um. Ïa kane la pyntip da ka tnat Public Health Engineering (PHE) Nongpoh Division bad ong ruh ba ka daw jong ka jingtyrkhong um ha sor Nongpoh ka dei tang namar ka jingdon ki ‘riew paidbah kiba tuh ïa ka um na ki pipe.
Ka um kaba la tuh ka dei na ki pipe kiba ka tnat PHE ka la tan ïa ka um na ka jaka pynlang um ha Nongthymmai bad la pynïaid ïa ki pipe um lyngba ka Wah Umran ban poi sha ka Treatment Plant kaba don ha Ïewmawlong.
Ha kaba ïadei bad kane, na ka liang jong u Executive Engineer ka PHE-Nongpoh Division, Bah U Kurbah, u la ïathuh ba ka tnat ka la ïohpdiang ïa ki jingujor ba ki don ki briew kiba tuh ïa ka um na ki pipeline jong ka tnat da kaba pynpei ïa ki pipe um ha shuwa ba ka um kan poi sha ka Treatment Plant ha Ïewmawlong bad ban sa sam sha ki paidbah ka sor Nongpoh.
“Ka jingshah tuh jong ka um na ki pipe ka pynlong ba ka um kan poi duna sha ka Treatment Plant bad lam sha ka jingduna ka um ban sam sha ki paidbah ka thaiñ Nongpoh,” u la ong bad halor kane na ka liang ka tnat ka la hiar ban jurip ïa ki katto-katne ki bynta ba don ka jingshah tuh ka um bad ka la shim ruh ïa ki lad ki lynti ban pynduh ïa katei ka jingtuh um hynrei ki briew ki dang jop hi bad ki dang bteng beit ban leh ïa kane ka kam.
Na ka liang u EE ka tnat PHE Nongpoh Division u la kyntu ïa ki briew ba kin sangeh noh ïa kane ka jingtuh um na ki pipe um namar kane ka um kam long satia kaba shngaiñ ban dih kat bym pat dep pynkhuid ïa ka ha ka Treatment Plant.
