Shillong, Jymmang 15
Ka All India Council for Technical Education (AICTE) ka la ai jingmynjur (Approval) na ka bynta ban sdang treikam noh ka Shillong Engineering College ha Jylla. Ïa kane la pyntip da u Myntri Rangbah ka Jylla Conrad K Sangma ha ka jingthoh kaba u la buh ha ka rynsan lad pathai X.
“Nga kmen palat ban pyntip ba ka Shillong Government College of Engineering ka la ïohpdiang ïa ka shithi jingmynjur na ka All India Council for Technical Education (AICTE) ban sdang noh ïa ka Civil Engineering bad Electrical Engine-ering course,” la ong u Conrad bad bynrap ba kane ka dei ka dak jong ka Government Engine-ering College ba nyngkong eh hapoh ka Jylla.
Ïa ka shithi jong ka jingai jingmynjur la phah sha u Principal Secretary ka tnat Pule Puthi ka jylla ha ka 30 tarik Ïaïong. Kane ka jaka pule ka don ha Mawlai Kynton Massar, East Khasi Hills district bad ka la pynïasoh ïalade bad ka North Eastern Hill University (NEHU), Shillong.
Ka kolej kan sdang noh ïa ka prokram jong ka Civil Engineering bad Electrical Engineering, da ka jingpynrung klas ba 30 ngut ki samla pule na ka bynta u snem 2025-26 bad kumba 10% ki seat la bhah kyrpang ïa ki samla kiba wan na ki longïing ba duna ka jingïoh kaba long katkum ka policy ka Sorkar Jylla.
Ha kajuh ka por la pyntip ba katkum ki kyndon ka AICTE, kane ka kolej ka dei ban pynbiang lut ïa ki jingdonkam haba ïadei bad ki jingtei, ka jingthung Nonghikai bad ka jingai jinghikai kaba janai.
Ka kolej kan hap ban ïoh ïa ki jingpynïasoh/jingbit na ki University ba ki leit pynïasoh/Board of Technical Education (BTE)/ Board of Technical Education & Training (BTET) katkum ka schedule jong ka University/ Board of Technical Education (BTE)/ Board of Technical Education & Training (BTET) bad kiwei kiwei.
