Shillong, Jymmang 15
U Secretary ka shnong Dawki kaba hap ha Amlarem Civil Sub Division, West Jaiñtia Hills District, Bah Arjun Pohlong, u la kyrpad ïa ka Sorkar ba kan ker noh ïa u sainar shiah ha shi lynter ka shnong Dawki khnang ban shngaiñ na ki ‘riew sniew kiba wan na ri Bangladesh.
Kane ka jingkyrpad u Bah Arjun ïa ka Sorkar ka dei ha ka jingïakynduh kyrpang bad u nonglum khubor U Nongsaiñ Hima uba la hiar na Shillong ban wad jingtip shaphang ka shongsuk shongsaiñ hadien ba ka Sorkar Jylla ka la pynjari korphiw miet sha khappud bad ka Bangladesh hadien ba la don ka jingïather hapdeng ka India bad Pakistan.
U la kyrpad ïa ka Sorkar ba kan pynkloi noh ban ker sainar shiah ha shnong Dawki tangba kam dei ban ktah ïa ka jaka rep khnang ba ki nongshong shnong kin ym duhnong namar lada ym lah ban ker sainar shiah lada wan rung ki nong Bangladesh ym lah ban kynthoh ïa ki shipai namar haduh mynta ka khappud Dawki ka dang laitluid ban rung sha Bangladesh.
U la ïathuh ba naduh ba ka Sorkar Jylla ka la pynjari da ka korphiw miet ha khappud, na ka liang ka shnong Dawki ki la ïatreilang bad ki pulit bad ki BSF na bynta ban wanrah ïa ka shongsuk shongshngaiñ ha khappud.
Shuh shuh u la ïathuh ba mynshwa ki dukan ki shait khang kumba 9:00 baje haduh 10:00 baje mynmiet hynrei naduh ba la pynjari korphiw miet, ki dukan ki la khang beit naduh 8:00 baje janmiet.
Halor ka thma India bad ka Pakistan, u la ong ba kine ar tylli ki ri ki don beit ka jingïakynad namar kaba la jia bunsien hynrei katkum ka jingïohi ka India ka la pynkhreh bha.
U Bah Arjun u la ïathuh ba wat la ka jingshah hiar thma ïa ki nongjngohkai pyrthei ha Pahalgam da ki lehnoh hynrei lada phai sha Dawki ki nongjngohkai pyrthei ki dang bun ban wan kai sha wah Umngot.
