Jowai, Jymmang 15
Ka Mowkaïaw CYC ka la ïoh rung sha ka final ha ka lympung ïalehkai District Cricket League 2025 ba la pynïaid da ka West Jaiñtia Hills District Association. Kane ka long hadien ba ka la lah ban pynliem noh ïa ka West Jaiñtia Police CC da 14 run ha ka sngi Palei.
Ha kane ka jingïakhun semi-final, ka Mowkaïaw CYC ka la kam trai ban tied nyngkong ha kaba ka la ïoh 101 run ha ki 20 over bad shah pynkhyllem 8 wiket. U Todan Rymbai u la tied 22 run na ki 15 bol kynthup ïa kawei ka ‘six’ bad lai tylli ki ‘four’, kumjuh u Kitboklang Lyngdoh u la tied 21 run na ki 25 bol ryngkat lai tylli ki ‘four’ bad u Bundaki Lynthong pat u la tied 20 run na ki 15 bol ryngkat kawei ka ‘six’ bad kawei ka ‘four’. Katba u Dabiang Marweiñ bad u Loverist Langbang ki la shim mar 3 wiket ha ki 4 over na ka bynta ka West Jaiñtia Police.
Haba wan beh ïa ka thong, ka West Jaiñtia Police kam shym la lah ban ïalehkai bha ha kaba ka la tied tang 87 run ha ki 20 over bad ban shah pynhap 9 wiket. U Bishal M Sangma u la tied 17 run na ki 10 bol, kumjuh u Sauni Nongtdu (12 run na ki 12 bol) bad u Devention Lyngdoh (12 run na ki 32 bol). Katba u Sanvert B Kurkalang bad u Kitboklang Lyngdoh ki la shim mar 3 wiket na ki 4 over na ka bynta ka Mowkaïaw. Ïa ka nam ‘Man of the Match’ la ïohpdiang da u Kitboklang Lyngdoh.
Kawei pat ka jingïaleh -kai semi final ba ar kan long ha ka sngi Saitjaiñ hapdeng ka Ummulong SC pyrshah ïa ka Mupliang SC ha ka por 8:30 baje mynstep.
