Shillong, Jymmang 15
Ki kam tuh kam thiem ki dang ïai bteng na kawei ka sngi sha kawei pat. Dang ha kine khyndiat sngi ba la leit na ka liang ki runar ki la ïoh ban prong tuh ïa ki dukan bad ruh ban tuh ïa ki arshaka na kylleng ki jaka.
Katkum ka khubor kaba la ïoh na ki pulit la ong ba ka Kong Hally Conia Marpna ka la ai ka jingujor ba ha kine ki khyndiat sngi, ha ka por kumba 11 baje mynmiet, ki runar bym lah ban ithuh, ki la ïoh ban prong tuh shapoh ka dukan jong ka kaba don ha Mawïong Umjapung Tariang-A, Shillong bad ban rah tuh ïa kawei ka marble cutter Ninjato, saw tylli ki earthing copper plates bad ka pisa kaba long T.1,300/-, bad kiwei kiwei.
Ha kawei pat ka khubor, u Rakjring R Marak u la ujor sha ki pulit ba hapdeng ka miet jong ka 12 bad 13 tarik mynta u bnai, ki runar bym lah ban ithuh ki la tuh ïa ka arshaka jong u kaba don ïa u registration number ML13-8813 na ka jaka ba u sahwai ha Songsak A’gitokgre ha East Garo Hills.
Kumjuh, na ka liang jong u John R Marak uba na ka shnong Mendal ha North Garo Hills u la ai ka jingujor ba ha ka 9 tarik mynta u bnai, ki runar bym lah ban ithuh, ki la tuh ïa ka arshaka jong u kaba don ïa u registration number ML07-B-7854.
Na ka liang jong u Suraj Kr Sharma uba na Bamunipanikhown, Assam ruh u la ai ka jingujor sha ki pulit ba ha ka step jong ka 10 tarik mynta u bnai, u la lap ba ka kali Bolero Pick-up jong u, kaba don ïa u registration number ML07-A-7501, ka la jah na ka jaka kaba u pynïeng, kaba hap hapoh ka thanat Mendipathar ha North Garo Hills.
