Shillong, Jymmang 15
Ka Khasi Students’ Union (KSU) Delhi Unit ha ka 14 tarik Jymmang 2025 ha ka por 4:00 baje janmiet ka la ïoh ïa ka ‘phone call’ na kawei ka kynthei kaba na ki thaiñ East Jaiñtia Hills District kaba la pan jingïarap namar ba don kiba bud ïa ka bad ba ka la sheptieng ba kin leh eiei ïa ka haba ka don sha Delhi.
Mar sien ïoh ïa katei ka phone call, ka KSU Delhi Unit ka la pyntip noh sha ki pulit Delhi bad leit lang bad ki sha katei ka jaka. Hadien ka jingtohkit kaba bniah, la lap ba katei ka kynthei la shah pynbiej ïa ka sha Delhi bad la thmu ban pynrung sha ki kam awria.
Hadien kane ka jingsngewphylla, ka KSU bad ki pulit ki la pyrshang ban wad ïa ka jaka ba ka shong, hynrei mar ïa tip ïa kane ka jingjia, ki briew kiba don ha katei ka jaka ki la phet krad.
Ïa kane ka mukotduma la aiti noh sha ki pulit ba dei peit bad ïa ka kynthei pat la buh ha ka jaka ba shngaiñ hapoh ka jingpeit jong ki bor ba dei khmih. Ki jingdonkam ki ban pynphai biang ïa ka sha Meghalaya ki dang ïaid shakhmat, bad yn leh tang hadien ba la ïoh jingbit na ki bor Pulit.
Ka KSU Delhi Unit ka la pynpaw ïa ka jingpyrshah kaba tyngeh halor kino-kino ki kam thombor ïa ki kynthei bad kyntu ruh ïa ki paidbah ban long kiba husiar bad pynsngew kloi sha ki bor ba dei peit lada lap ne suba don kano-kano ka jingjia kaba kum kane.
Ka seng ka ai khublei kyrpang ïa ki pulit ka Delhi halor ka jingïatreilang bad ka jingpyrkhat lang ha kane ka kam, bad ka long ruh kaba kloi ban ai jingkyrshan.
