Imphal, Jymmang:
Ki pulit jong ka Imphal East distrik jong ka jylla Manipur ryngkat ka jingïatreilang bad ka kynhun syntiat jong ki bor pahara pdeng kiba don ha Imphal, ki la kem ïa lai ngut ki briew ha ka sngi Ba-ar namar ka jingdonkti jong ki ha ka jingdie tuh ïa ki tiar ïaleh ba la shah khang pyrshah.
Ïa kine ki jingïoh kem la leh ha ki thaiñ Pukhao Ahallup Makha Leikai kiba hap hapoh ka jingpeit jong ki pulit ka Sagolmang Police Station ha Imphal East distrik.
Ïa kane ka jingtreikam la sdang katkum ki jingtip ba kyrpang jong ki riewstad, kaba la ïalam ïa ka kynhun ba ïatreilang sha kawei ka jaka kaba don hajan kawei ka jaka ap ha Pukhao.
La ïathuh ba ki briew kiba la shah kem ki dang ap ban pyndep ïa ka jingïateh halor ki tiar ïasiat da ka lynti kaba beaiñ bad uwei u nongthied, da kaba thmu ban die ïa ki tiar ha ka dor kaba la ïathuh ba ka long T. 3.5 lak tyngka.
Napdeng kine kiba la shah kem, la ithuh kyrteng kum u dei u Naorem Naocha Meitei uba la ju tip ruh kum u Chinglakpa uba la 38 snem ka rta uba shong ba sah ha Pukhao Ahallup Awang Leikai. La ong ba une u dei u dkhot batrei shitom jong ka kynhun lehnoh ba la shah ñiew beaiñ ka UNLF (jong ka kynhun lehnoh Pambei).
Ryngkat bad u, ki pulit ki la ïoh ban kem ïa u samla Leishangthem Inaoton Singh uba 23 snem ka rta uba la tip ruh kum u Aphao bad u Ayekpam Boiboy Meitei uba 26 snem ka rta uba la tip ruh kum u Ishanta Meitei bad baroh arngut ki dei ki nongshong shnong jong ka Pukhao Naharup ha Imphal East.
Ha kane ka jingkhynra, ki pulit ki la ïoh ban kurup ïa kawei ka suloi INSAS kaba dei ka kyrdan shipai ha ryngkat u Magazine, 8 tylli ki kuli 7.62 mm, lai tylli ki mobile phone, ar tylli ki bek pisa, bad ar tylli ki Identity Card na kitei ki runar.
Ki bor pynïaid ki la pynthikna ba ïa ki tiar ïaleh ba la ïoh kurup la ju pyndonkam da ki kynhun lehnoh kiba treikam ha katei ka thaiñ, kaba pyni ïa ka jingpynkheiñ kaba jur ïa ka jingshngaiñ.
La buh jingmudui da ka mukotduma katkum ki kyndon aiñ kiba ïadei, bad ki jingtohkit ki dang ïaid shakhmat ban wad ïa ka tynrai jong ki tiar bad ban ithuh ïa kiwei pat ki briew kiba lah ban don jingïadei bad ka kynhun jong ki tiar beaiñ.
