Jowai, Jymmang 15
Ka Jaiñtia Student’s Union (JSU) ka la ai por shi bnai ïa ka District Selection Committee (DSC) ka West Jaiñtia Hills ban pynlong ïa ki eksamin na ka bynta ki kam bapher bapher kiba la pynbna mynshwa hapoh ka District Selection Committee (DSC), West Jaiñtia Hills.
Ka JSU ha ka jingïakynduh bad ka Additional Deputy Commissioner ka West Jaiñtia Hills District, Kong HML Kynta ha ka Sngi Palei, ka la ong naduh ba la pynbna ïa kine ki kam bad wat la katta ruh, ym pat lah ban pynlong ïa ki eksamin.
Kane ka jingpynslem ka pynmih ïa ka jingbym thikna bad jingkhuslai hapdeng kiba bun ki kyrtong kiba dei hok kiba ap ïa ka lad kaba hok ban ïoh kam.
Ka JSU ka kyrpad ban pynsted ïa ka jingtreikam bad ban pynlong ïa ki eksamin ha ka por kaba kloi lan. Ka jingpynlong ïa ki eksamin khlem da pynslem kan ym pynthikna tang ïa ka jinglong kaba shai bad kaba hok hynrei kan pynim biang ïa ka jingshaniah jong ki paidbah ha ka rukom thung kam.
Nalorkata, ka JSU ka kyrpad ruh ban khot ïa ki aplikeshon thymmai na ka bynta ki kam bapher bapher kiba lait hapoh ka District Selection Committee jong ka West Jaiñtia Hills District. Ka jingpynbna kloi bad ka jingpyndap ïa kine ki kam ka long kaba donkam na ka bynta ka jingtreikam kaba suk jong ki ophis paidbah bad na ka bynta ban weng ïa ki jingeh jong ka jingbym don kam kiba ki briew kiba tbit kiba bun ha ka distrik ki ïakynduh.
Lah ban kdew ba ka JSU dang shen ka la pynlong ïa ka jingïalang bad u Deputy Commissioner jong ka West Jaiñtia Hills District ban weng ïa ka jingpynslem ban pynlong ïa ki eksamin thungkam na ka bynta ki kam ba la pynbna naduh ka 19 tarik u Naiwieng (November) 2021. La lap ba ki dang sah haduh 92 tylli ki kam ba lait ha kylleng ki tnat jong ka district ki bym pat lah ban pyndap.
