Delhi, Jymmang 15
U Dr. Ajay Kumar, Secretary barim ka tnat Ïada Ri, ha ka Sngi Palei u la shim ïa ka jingsmai kum Chairman jong ka Union Public Service Commission (UPSC). Ïa kane ka jingbam smai la pynïaid da u Lt. Gen. Raj Shukla (Retd.), u dkhot rangbah jong ka Commission.
Hadien ba la pyndep ïa ka B.Tech ha ka Electrical Engineering na ka Indian Institute of Technology, Kanpur, u Dr. Ajay Kumar u la pyndep ïa ka M.S. ha ka Applied Economics na ka University of Minnesota, USA bad Ph.D ha ka Business Administration na Carlson School of Management, University of Minnesota, USA. La pynkup burom ruh ïa u da ka Hon. Doctor of Philosophy na ka skulbah Amity ha u snem 2019.
U Dr. Ajay Kumar u dei na ka 1985 batch jong ka Indian Administrative Service (IAS) jong ka Kerala Cadre. Ha ka jingtrei jong u, kaba la palat laiphew san snem, u la shakri ha ki kyrdan ba kongsan ha ka Sorkar Jylla Kerala bad ruh ha ka Sorkar Pdeng. Katto-katne ki kam ba kongsan jong u ha ka Jylla ki long kum u Managing Director, ka tnat Electronics and Information Technology; Principal Secretary, Information Technology Department. Ha ka Sorkar Pdeng u la bat ïa ki kam ba kongsan kum Director, Science & Technology; Joint Secretary, tnat Communications and Information Technology; Director General, National Informatics Centre; Additional Secretary, tnat Electronics & Information Technology; Secretary, Defence Production. Ha ka kam kaba khatduh jong u, u la shakri kum Secretary tnat Ïada Ri.
U la don ka bynta kaba heh ha kaba wanrah ïa ki katto katne ki sienjam e-Governance kum ka “Jeevan Pramaan” (ki digital life certificate na ka bynta ki nongïoh baibam tymmen); myGov, Pragati (ka video conferencing jong u Myntri Rangbah duh); ka Bio-metric Attendance System; Ka rukom kyntiew kyrteng OPD ha AIIMS; Ka polisi “Cloud First” na ka bynta ka Sorkar ban pyndonkam ïa ki Cloud Service Provider, bad kiwei kiwei.
U Dr. Ajay Kumar u don katto-katne ki kot kiba u la pynmih ha ki kot khubor bapher bapher ha ka ri bad ka pyrthei. Kumjuh, u la ïohpdiang katto katne ki khusnam kum ka “Silver Elephant” medallion na ka National Scouts and Guides ha u snem 1994; “Electronics Leader of the Year for the year 2012 na ka bynta ka jingkyntiew ïa ki kam ilektronik ha ka ri; ka “Technovation Sarabhai Award’ na ka India Electronics & Semiconductor Association ha u snem 2015; ka “Champion of Change” na ka Consumer Electronics & Appliances Manufacturers Association ha u snem 2017.
