Shillong, Jymmang 15
Ka East Khasi Hills District Chess Association (EKHDCA) kan pynlong ïa ka jingjied nongïalehkai (District Selection) ha ka 30 bad 31 tarik mynta u bnai ha Khasi National Dorbar Hall, Mawkhar, Shillong naduh ka por 9 baje mynstep.
Ki 20 ngut nongïalehkai ki ban wan ha ki kyrdan ba ha khlieh kin ïoh ka lad ban mihkhmat ïa ka District sha ka “48th Meghalaya State FIDE Rating Chess Championship 2025” ka ban long ha Shillong ha ka taïew ba khatduh u Jylliew mynta u snem.
Kat kum ka kyrwoh ba la pyllait da u Bah Rijied Katrai, General Secretary la ong ba ka bai rung kan long T. 300/- marwei bad T. 250/- na ka bynta ki nongïalehkai kiba la pynrung kyrteng hapoh ka AICF. Ki nongshim bynta ki lah ban siew lyngba ka Gpay ha u number 8794777913 bad ban phah lang ïa ki kyrteng jong ki. Ka tarik ba khatduh kan dei ha ka 29 tarik naduh ka por 6 baje janmiet.
Ki nongjop kin ïohpdiang da ki khusnam pisa lem ki trophy bad ki takma. Ïa ki jingtip ba bniah ki lah ban ïakynduh ïa ka Kong Sumar Selon K Khonglah, Jt. Secy (8794777913), Aity Lyne Diengdoh (9366058853) bad Bah R. Katrai (8787333937).
