Shillong, Jymmang 16
Ka Voice of the People Party (VPP) Youth Wing hapoh ka jingïalam jong u President, Bah Marbud Dkhar bad u Secretary samla Nathaniel Mawrie, ha ka 15 tarik Jymmang, 2025, ka la leit ban ïakynduh ïa u General Manager ka General Manager Telecom Division BSNL, u Saleem Bara hadien ka jingïohpdiang ïa ka jingujor na ki nongtrei kiba trei kum ki nongpynkhuid hapoh katei ka shlem treikam halor ka jingbym ïoh ïa ka tulop kaba la neh mynta la 13 bnai eiei.
Haba kren sha ki lad pathai khubor, u Bah Marbud Dkhar u la ong ba kitei ki nongtrei ka ophis ki la pynpaw ba ki khlem ïoh ïa ka tulop jong ki naduh u bnai Jymmang mynshem snem bad kaba la neh haduh mynta u snem kaba la pynlong ïa ka seng ba kan dap da ka mynsiem ka jingshongkhia halor kane ka bynta.
U Bah Marbud u la ong ba ha ka jingïathir-ïatai bad u General Manager katei ka ophis treikam ka la neh kumba shikynta eiei ha kaba na ka liang u General Manager u la khot lut ïa baroh ki ophisar ka ophis treikam ban kylli pyrthew halor ka daw ba la pynlong ïa ka ophis ba kan ym lah ban siew ïa ka tulop jong ki nongtrei.
U Bah Marbud u la ong ba ka daw ba la pynpaw da kitei ki ophisar halor ka jingbym lah ban siew ïa ka tulop sha kitei ki nongtrei ka long ba ki khlem pat ïoh ïa ka ‘bill’ wat hadien ba ki la dep ban phah sha ka ophis kaba don hajan ka Additional Secretariat.
“Ngi la ong ïa u General Manager ba kumno ki ai kam ïa ki paradoh-parasnam jong ngi bad ki phah ban pynkhuid ïa ka ophis hynrei ïa ka jingsiew pat ki khlem lah ban siew. Haduh kumba 13 bnai eiei, ka tulop ki khlem ïoh na kane ka ophis jong ki bad na ka liang ka VPP ngi la sngewkhia bha haduh katta-katta namar kine ki dei ki longkmie bad ka jingïoh ruh ka long kaba rit bad kane ka la ktah bha ïa ki kumno kin pynïaid ïa ka ïing-ka sem”, ong u Bah Marbud.
Shuh-shuh, u Bah Marbud u la ong ba ka jingleh jong kane ka ophis treikam ka dei kaba la ñion beiñ ïa ki nongtrei da kaba bynrap ba na ka liang ka seng ka la banjur bad ai por ruh ba katei ka ophis treikam ka dei ban siew noh mynta u bnai ïa ka tulop jong ki nongtrei.
Na ka liang katei ka ophis treikam ka la mynjur ban wad ïa ki lad-ki lynti ban siew noh ïa ka tulop jong ki nongtrei na ka bynta saw bnai bad ïa kaba sah pat, katei ka ophis ka la kular ba kan sa pyllait noh shisyndon ïa ka jingsiew sha ki nongtrei.
