Shillong, Jymmang 16
U Bah Kyrshon Marbaniang uba dei u Lyngdoh ka Raid Mylliem kaba hap hapoh ka Hima Mylliem u la mih shakhmat ban pynshai sha ki khun ki hajar ka Raid Mylliem halor ka jingkynnoh pyrshah ïa u lyngba ki rynsan ‘social media’ da u Myntri Kharkongor bad Myntri Sohtun ba ka daw ka jinghap ban pynsangeh noh ïa ka jinglehniam jong ka Raid Mylliem mynta u snem ka dei na ka daw ba u la donkti ban pynkulmar da kaba thombor ïa ki.
Haba kren sha ki lad pathai khubor ha Shillong Press Club ha ka 16 tarik Jymmang, 2025, u Lyngdoh ka Raid Mylliem u la ong ba kane jingkynnoh pyrshah ïa u da ki Myntri ka dei ka bym don nongrim bad kaba um lah ban pdiang kum u Lyngdoh ka Raid Mylliem uba ju peit bad khlieh ïa ka jinglehniam ha ka Raid Mylliem.
U la ong ba haba ïadei bad ka jinglehniam jong ka Raid Mylliem mynta u snem 2025, ka Dorbar Raid Mylliem ka la dep ban shong pyrkhat la arsien kata ha ka 9 tarik bad 14 tarik u Ïaïong, 2025. Ha kine ar tylli ki dorbar la dep rai ban ym lah ban leh ïa ka jinglehniam ha une u snem.
U la ong ba ïa ka rai kaba khadduh yn shim ha ka 25 tarik u Ïaïong, 2025 hynrei ha katei ka sngi tang ka dorbar kam pat sdang ka la mih noh ka huri-hura bad ym shym la lah shuh ban pynlong ïa ka dorbar ha katei ka sngi.
U Lyngdoh ka Raid Mylliem u la kynnoh ba ka don ka jingleh donbor da ki Myntri kiba dei na ki San Kur Khatwei Kur bad u la ong ba ki Myntri ki pyrshang ban ïuhroit ïa ka jinglong Lyngdoh namar ba um ju ïohlad ban pynïaid ïa ka dorbar kumba ki longshwa-manshwa ki don ïa ka bor.
“Kumba ki Lyngdoh barim kiba la leit noh nangne napoh ka sla pyrthei, ki ju bahkhlieh ïa ka niam bad nga ïohi ruh ba ki ju don ïa kata ka dorbar bad u Lyngdoh ka Raid Mylliem ha baroh ki liang treikam jong ka Raid. Hynrei ha kane ka jinglong Lyngdoh jong nga, nga sngew ba ngam ïohlad ban pynïaid ïa ka dorbar kumba kitei ki Lyngdoh ba mynshwa ki ju ai ïa ka bor,” ong u Lyngdoh.
Na ka liang u Lyngdoh u la buh ka jingkyntu ïa u Myntri Kharkongor bad ïa u Myntri Sohtun ba kin pynbeit noh ïa kane ka kam ha ka lynti kaba dei khnang ba kan wanrah ïa ka suk ka saiñ ha ka Raid Mylliem bad ong ba lada kim sngew lah, ki dei ban ailad ïa u Lyngdoh ba un lum un lang ïa ka dorbar kumba ki Lyngdoh barim ki ju leh bad pynïaid.
