Shillong, Jymmang 16
Ka Confederation of Meghalaya Social Organizations (COMSO) ka la kyrpad ïa u Lat ka Jylla Manipur ban thung da ka jingtohkit kaba laitluid halor ka jingkynnoh pynïap ïalade jong kawei ka samla pule nos ïa kaba la tip kyrteng kum ka Abiel Salchiana Ch Marak ha Regional Institute of Medical Sciences (RIMS) ha Imphal, Manipur.
Kum ban shu kdew hangne, ka samla Abiel Salchiana Ch Marak kaba don 21 snem ka rta bad kaba dang pule ha ka BSc. 4th Semester kaba dei ka shnong trai na Rongram kaba hap hapoh ka West Garo Hills, ha ka 14 tarik u Jymmang, 2025, la lap ba ka la sdien phasi noh ïalade ha ka kamra hostel lade.
Ha ka shithi ba la phah sha u Lat ka Jylla Manipur, u Ajay Kumar Bhalla, ka COSMO ka la ong, “Kane ka jingjia kaba pynsngewsih kam shym la pynsheptieng tang ïa ka jingshaniah jong ki samla pule bad ki bahaïing-bahasem jong ki, hynrei ka la buh ruh ïa ki jingkylli kiba kong-san halor ka akor ka burom jong ki jaka pule, ka jingsngewrit, bad ka jinglong ba kynthup lang ïa baroh. Ka hok na ka bynta ka Abiel Salchiana Ch Marak kam dei tang ka mat jong ka jingdonkam katkum ka aiñ-ka dei ka jingkitkhlieh kaba donkam kaba khot ïa ka jingpyrkhat lang bad ka jingleh ban pynbha”.
Ka COMSO ka la dawa ruh ïa ka kynhun tohkit kaba laitluid kaba la khlieh da u nongbishar ba dang shong ne uba la shongthait bad uba don ka jingstad kaba biang ha ka liang ka aiñ, ka jingpeit bniah, bad ka jingmut jingpyrkhat ban tip ïa ki daw ba shisha bad ki daw kiba la pynlong ïa ka jingïap kaba ym pat dei por jong ka Abiel Salchiana Ch Marak.
“Ka jingbym don ka jingtohkit kaba shai bad kaba laitluid jong ka aiñ ka la pynjur tang ïa ka jingsngewsih, jingsuba, bad ka jingshah pynmynsaw kaba ki samla pule, ki kmie ki kpa, ka jaitbynriew Garo, bad ki paidbah ha ka jinglong kyllum ki mad,” la ong ka seng.
Nalor kata, ka COMSO ka la pan ruh ïa ka jingïada bad jingkyrshan ïa ki samla pule, ki nongsakhi, bad ki nongpynbna khubor, kynthup ïa kito kiba kwah ban ai jingphla, bad ka jingpynsangeh shipor ïa kino-kino ki heh ne ki nongtrei kiba la lap ba ki donkti haduh ban da kut ka jingtohkit.
Nangta, ka la dawa ruh ïa ka jingpynthikna halor ka jiingshah lehbeiñ bad ka jingïada na ka bynta ki samla pule riewlum bad ki rit paid kiba pule ha Manipur, khamtam kito kiba na Meghalaya.
Ka la dawa ruh ban pyntreikam noh kloi ïa ki kyndon jingïada haba ïadei bad ka bor pyrkhat, ki lad jingïada pyrshah ïa ka jingshah lehbeiñ, bad ki lad jingpynbeit hapoh jong ka na ka bynta ki jingeh jong ki samla pule.
