Shillong, Jymmang 16:
Ka jingshna ïa ka surok na Shillong sha Pynursla ban poi sha Dawki ka la ïaid shaid-shaid namar la ïohi ba ka kompani ba pyntrei ïa ka kam ka la sdang ban tih nongrim ïa ka riat ban pynïeng païa bad ban shna ïa ka jingkieng thymmai ha Wah Umngot kaba don haneng ka shnong Dawki.
Ka jingshna ïa ka surok na Shillong sha Dawki lyngba ka Pynursla ka la ïaid mynta la katto-katne snem hynrei kaba dang kham slem ka dei beit ha riat Rngaiñ shwa ban poi sha Pynursla namar ki bun palat ki riat kiba jylliew.
Ha ka jingjurip u nonglum khubor la ïohi ba ka kompani kaba shna ïa kane ka surok la sdang ban siangrong ha ki jaka ba long madan naduh Hynñiewmer haduh riat Rngaiñ hynrei don ki bynta kum ha Umtyngngar ka kompani ka dang tih ïa u lum ban pynmadan.
Shuh shuh don ki jaka ba long madan ha riat Rngaiñ ka kompani ka la dep siangrong hynrei mar shu sdang na lad shnong Mawkhap ka kompani ka dang sdang tih ïa u lum ban pynheh ïa ka surok.
La ïohi haba ki JCB ki dang tih ïa u lum la hap ban pynsangeh baroh arliang ki kali kiba kiew bad kiba hiar khnang ban ym don ka jingmynsaw ha ka por ba ki ïaid.
Nangta, ïa kane ka surok thymmai la ïaid lait noh na Wahkdait ban ïaid narud shnong ban poi sha Umsyiem ban shna syndon ïa ka jingkieng thymmai ban poi pyrshah ïa ka Dawki PHC.
Kane ka jingkieng thymmai kan kham jrong bad kan kham jylliew namar yn shna kham shaneng ïa ka jingkieng rim kaba ïaid mynta kaba don ha ka Wah Umngot.
La ïohi ruh ba ka kompani ka la dep shna ïa ka surok four lane naduh jingkieng thymmai kaba don syndah ka Dawki PHC hynrei katba shajan ka shnong Bakur ka kompani ka dang tih ïa ki lum ban pynpoi shaduh Tamabil.
Haba ïoh ban ïakren bad u Secretary Shnong Dawki, Bah Arjun Pohlong, u la ïathuh ba ka jingtrei ïa ka surok na Pynursla sha Dawki ka la ong kumba 60 percent bad u kyrmen ba kane ka surok kan dep noh ha u snem 2027-28 kumba la buh thong da ka sorkar.
U la ïathuh ba ïa kane ka surok la ïaid lait noh naduh Wahkdait ban ïaid na khlaw ban poi sha Umsyiem bad na Umsyiem yn shna ïa ka jingkieng thymmai ban poi shaneng ka Dawki PHC.
Namar kata, u kyrmen ba lada dep kane ka surok bad ka jingkieng bathymmai kan pynsuk ïa ki paidbah kiba wan kai namar kane ka surok kaba mynta ka long kaba rit.
