Shillong, Jymmang 16
Ka Umlyngka Presbyterian Lower Primary School ha ka 16 tarik u Jymmang, 2025 ka la pynhap pyrda noh ïa ka jingrakhe dap 150 snem lane ka ‘Sesquicentenial Jubilee’ jong ka skul naduh ba la seng ïa ka ha u bnai Jymmang 1875.
Ha kane ka sngi rakhe pynhap pyrda, u Dr W.R. Kharlukhi uba dei u MP ka Rajya Sabha u la long kum Kongsan ha ryngkat ka jingsynran lang u Bah Hamletson Dohling kum Symbud Kongsan bad uba dei ruh u MLA barim ka Mylliem Constituency bad ha kajuh ka por kum u nongai jingmut jong u Myntri Rangbah ka Jylla ba mynta.
Haba ai jingkren ha kane ka sngi, na ka liang u Bah Hamletson Dohling, u la pynpaw ïa ka jingsngewkmen bad ka jingsngewburom ïa ki nonghikai jong kane ka skul kiba la trei shitom ban ai jinghikai ïa ki hep barit ha shwa ba kin kiew sha ki kyrdan ba kham shajrong.
“Na kane ka Umlyngka Presbyterian Lower Primary School ki la mih bun ki soh kiba long ki jingmyntoi ïa ka imlang sahlang, ka Jaitbynriew kiba la shakri ha ki kyrdan bapher-bapher la ka long ha ki kam Sorkar, kam hikai skul, ki jaka ai jingsumar bad kumta ter-ter”, ong u Bah Hamletson.
U Bah Hamletson u la ong ba ki 150 tylli ki snem ka dei ka lynti kaba eh bad kaba jlan bha ban pynroi bad pyntyllun ïa ki kam jong ka skul.
“Ban pynïaid bad ban seng ïa ki skul kam dei ka kam kaba suk; ka dei ka kam kaba khia tam namar ka don ka jingkitkhlieh haba seng ïa ki skul”, ong u Bah Hamletson.
U Bah Hamletson u la bynrap da kaba ong ruh ba un sa noh jingïarap katba lah ka bor na ka bynta kane ka skul.
Na ka liang u Kongsan haba ai jingkren ha kane ka sngi, u la ong ba u dap da ka jingsngewkmen ban wan ïuhkjat hapoh kane ka skul namarba ki don ki nonghikai jong katei ka skul kiba u la ju ai jinghikai teng ha ka por mynshwa.
Shuh-shuh, u MP u la ong ruh ba u don ka jingsngewtynnad ïalade ban long kum u nonghikai ban ïa kaba u long kum u nongmihkhmat namarba ka kyrdan nonghikai ka long kaba kham donburom.
U la ong ruh ba wat la ka skhim MP jong u ka la poi noh sha kaba kut hynrei wat la katta un shong ryngkat bad u Bah Hamletson ban pyrkhat na ka bynta ban ïarap ïa kane ka skul.
Ha katei kajuh ka sngi, u Kongsan u la plie pyrda ruh ïa u mawnongrim jong ka jingdap 150 snem ka skul ha ryngkat ka jingpyllait ruh ïa ka ‘Souvenir’ jong kane ka skul.
La ïoh ruh ïa ka jingai jingkren na ka Principal jong kane ka skul kaba la pynsngew halor ka kaiphod treikam jong kane ka skul naduh ba la seng ïa ka tad haduh une u snem ba mynta.
Ha kane ka sngi pynhap pyrda, la ïoh ruh ïa ka jingshad bad ka jingrwai na ki khynnah skul bad la ïoh ruh ban sam ïa ki khusnam da u Kongsan bad u Symbud Kongsan sha ki khynnah skul kiba la jop ha ki jingïalehkai bapher-bapher.
