Shillong, Jymmang 16
Ki ‘riew ieid phutbol jong ka Kerala ki dang ïai ap khmih lynti ban ïohi ïa u khlur ïalehkai ba ki ieid eh u Lionel Messi lem bad ka kynhun ïalehkai phutbol ka Argentina, kaba la rah nam lahduh ha ka World Cup, ba kin wan ïuhkjat ha Kerala.
Dei ha u Naiwieng mynshem snem, u Myntri ka tnat ïalehkai ka Kerala u V. Abdurahiman bad ka kynhun jong u hadien ka jingpyrshang kaba khraw kaba kynthup katto-katne sien ki jingïakren bad ka Argentina Football Association (AFA) hadien ka jingïalang kaba la long ha Spain, la pynbna ba u Messi bad ka kynhun jong u kin ïalehkai la kumno-kumno kawei ka jingïalehkai bar ri ha Kerala kum shi bynta jong ka jingïalehkai paralok kaba kin pynbeit.
Hynrei, da ka jingbuh por jong ka Argentina na ka bynta u snem 2026, ka Kerala kam don ha kano-kano ka jaka ban wanrah ïa katei ka kynhun kaba na South America namar ka la thmu ban leit ïalehkai sha China, Qatar bad Africa.
U Lionel Messi, u la ïalehkai khatduh ha India ha u snem 2011, ha ka por ba ka Argentina ka la ïakhun pyrshah ïa ka Venezuela ha ka jingïalehkai paralok bar ri kaba la long ha Salt Lake Stadium ha Kolkata. Napdeng ki nongkyrshan kiba la wan ban ïashim bynta ki don katto-katne ngut ki ‘riew ieid phutbol na Kerala, kynthup ïa u General Secretary ka CPI(M) u M.A. Baby uba la wan ban ai mynsiem ïa u Messi.
Kaba sngewtynnad ka long ba ha ki distrik kiba sngewtynnad bha ïa ka phutbol jong ka Malappuram bad Kozhi-kode, ka kynhun ïalehkai jong ka Argentina ka ïoh ïa ka jingkyrshan kaba khlaiñ bha kaba la neh la bun snem. Kane ka jingkyrshan ka la poi sha ki kyrdan ba thymmai hadien ba u Messi u la ïalam ïa ka Argentina sha ka jingjop ha ka lympung ïalehkai FIFA World Cup 2022 ha Qatar.
U Abdurahiman, uba dei u trai shnong na Malappuram, u la trei borbah ban wanrah ïa u Messi ban ïalehkai ha Kerala. Ha u snem ba la dep, u la ïalam ïa ka kynhun sha Spain bad pynbna ba katei ka jingïalehkai kaba la khmih lynti bha kan long ha ka ‘quarter’ kaba khatduh jong u snem 2026. Hynrei ka jingkyrmen jong baroh ar u Abdurahi-man bad ka sorkar Kerala ka la pulom noh, bad ka jingap khmih lynti ka dang ïai bteng na ka bynta ki ‘riew ieid phutbol ha katei ka jylla.
Kaba kham kongsan ka long ba ka Kerala kan leit sha ka jingthep vote ha u Ïaïong/Jymmang ha u snem 2026 ban jied ïa ki nongmihkhmat kiba thymmai bad ka jingïalehkai FIFA World Cup ruh la buh ban long ha u snem.
