Shillong, Jymmang 16
Ka North East United Football Club (NEUFC) ka la pynlong ïa ka jingai jinghikai ban jied ïa ki khynnah ïalehkai phutbol lane ka Scouting Trials ha madan phutbol jong ka Kynshi Pyllun, Eastern West Khasi Hills District ha ka 14 bad 15 tarik mynta u bnai.
Kane ka jingjied ka long na ka bynta ki khynnah kiba la kha hapdeng u snem 2005 bad 2010. Ha kine ki ar sngi ki la don da ki spah ngut ki khynnah ïalehkai kiba la wan ban pyni sap ïalade ha kane ka jingpyrshang. Te kumta ki khynnah ki la pynpaw ka jingsngewkmen ïa kane ka lad khamtam ka kynhun ïalehkai ba paw jong ka ri India baroh kawei ka wan ban pynlong ïa ka prokram ha katei ka shnong.
