Bhuj, Jymmang 16 (UNI)
U Myntri ka tnad Ïada Ri, Rajnath Singh ha ka Sngi Thohdieng, u la pynskhem ba ka ‘Operation Sindoor’, kam pat kut satia bad ka jingther kaba dang shen, ka dei tang kum ka “trailer” bad ïa ka dur-khih ba pura (full picture) yn sa pyni ha ka por kaba biang.
“Ka jingïakhun jong ka India pyrshah ïa ki kam lehnoh kam dei tang ka kam ïada ri, mynta ka la kylla long ka bynta jong ka nongrim ïada ri, bad ngin pynduh tynrai ïa kane ka thma ‘hybrid’ bad ‘proxy’,” la ong u Rajnath Singh haba kren sha ki shipai suiñ ha Bhuj Air Force Station, ong ka kyrwoh na ka tnad ïada ri.
U la ban jur ba ka jingsangeh ïasiat kaba mynta ka mut ba ka India ka la buh ïa ka Pakistan ha ka jingbishar halor ki kam jong ka. Lada ka jinglong ka manbha, ka long kaba bha; hynrei lada don kano-kano ka jingpynthut, yn ai ka jingpynshitom kaba jur tam, u la ong.
U la kren shai ba ka ‘Operation Sindoor’ kam pat kut satia.
“Ki jingleh jong ngi ki long tang kum ka ‘trailer’, ngin sa pyni ïa ka dur-khih kaba pura lada donkam bad ‘ka jinghiar thma bad ban pynduh jait ïa ki kam lehnoh ka dei ka rukom long bathymmai jong ka India bathymmai’.”
Haba pynpaw ba ka Pakistan ka la sdang ban tei biang pat ïa ki ktem lehnoh jong ka kiba la shah pynjot ha ka India, u Myntri u la wer ïa ka International Monetary Fund (IMF) ban pyrkhat biang halor ka jingïarap pisa kaba shi ‘billion dollar’ sha ka Islamabad bad ban kiar na kaba ai kano-kano ka jingkyrshan hadien-habud kumjuh.
“Ka Pakistan kan pynlut ïa ka khajna ba la lum na ki nongshong shnong jong ka ban ai kumba T.14 klur sha u Masood Azhar, khlieh jong ka seng lehnoh Jaish-e-Mohammed, wat la u dei u lehnoh uba la ithuh da ka UN,” la ong u Myntri.
“Ka Sorkar Pakistan ka la pynbna ruh ïa ka jingïarap pisa ban tei pat ïa ki ktem lehnoh jong ka Lashkar-e-Taiba bad Jaish-e-Mohammed kiba don ha Muridke bad Bahawalpur. Hooid, ka bynta kaba khraw jong ka jingïarap kaba shi ‘billion dollar’ na ka IMF yn pyndonkam ban bei tyngka ïa ki jingtei jong ki lehnoh. Hato yn ym kheiñ ïa kane kum ka jingai pisa (indirect) da ka IMF, ka kynhun seng jong ka pyrthei?” la kylli u Rajnath.
“Kano-kano ka jingïarap pisa sha ka Pakistan kam pher na kaba ai jingïarap pisa sha ki lehnoh. Ïa ka pisa kaba ka India ka ai sha ka IMF ym dei ban pyndonkam, la ka long ha kano-kano ka rukom, ban thaw ïa ki jingtei jong ki lehnoh ha Pakistan ne ha kano-kano ka ri,” u la ong.
U Myntri u la ïaroh ruh ïa ka bynta kaba kongsan jong ki shipai suiñ ka India ha ka ‘Operation Sindoor’ kaba la ïoh jingïaroh na ka pyrthei baroh kawei.
Haba pynpaw ba ki liengsuiñ ïapom ka India ki lah ban siat ha man la ki jaka kyndong jong ka Pakistan khlem da jam sha shiliang khappud, u Rajnath u la ong, “Ka pyrthei ka la sakhi kumno ka IAF ka la pynpra ïa ki ktem jong ki lehnoh bad hadien pat ïa ki ktem liengsuiñ jong ka Pakistan. Ka IAF ka la pyni ïa ka jingpynshisha ba ka polisi thma bad ka teknoloji jong ka India ka la kylla. Ki la pynsngew ïa ka khubor jong ka India bathymmai, ba ngim shaniah tang ha ki tiar ïaleh bad ki rynsan ba la wanrah na shabar, hynrei ki tiar ‘Made in India’ ki la kylla long shi bynta jong ka bor shipai jong ngi.”
Shuh shuh u Myntri u la bynrap ba ka Pakistan hi ka la pdiang ïa ka bor jong u namding ‘BrahMos’. Une u namding ‘Made in India’ u la pyni shai ïa ka Pakistan, u la ong, da kaba ai jingïaroh ïa ka jingïada suiñ ka India, ha kaba u ‘Akash’ bad kiwei-kiwei ki ‘radar’ ba la shna da ka DRDO ki la don ka bynta kaba khraw.
Ha ka jingïakren jong u bad ki shipai Indian Army ha Badami Bagh Cantt ha Srinagar ha ka Sngi Palei, bad ki shipai suiñ lem bad ki shipai ha Bhuj mynta ka sngi, u Rajnath u la pynpaw biang sa shisien ba u long uba sngewskhem ba ki khappud ka Indsia ki long kiba shngaiñ pura.
