Jowai, Jymmang 16
U MLA ka Jowai, Bah Wailadmiki Shylla ha ryngkat ka jingsynran lang ki ophisar ka tnad PWD bad kontraktor ha ka 16 tarik Jymmang u la leit ban jurip ïa ka jingtei ‘Mini Secretariat’ bad ka jingtei ïa ka Ïawmusiang Market Complex, Jowai khnang ban pyntikna ba ki jingtei kin dep noh ha ka por kaba biang.
U Bah Shylla haba kren sha ki lad pathai khubor hadien ba la jurip u la ong, ka jingkwah jong u kum u MLA, ka long ba kino-kino ki jingtei kiba la sdang dei ban pyndep ha ka por kaba biang khnang ba kan long ka jingkyrkhu ïa ki paidbah.
U MLA u pynpaw ka jinghun bad jingsngewkmen ban ïohi ba baroh ar ki jingtei ki la ïaid shaid-shaid.
Halor ka ‘Mini Secretariat’, u la ong ka la kynjoh 85% ka jingpyndep ïa ka jingtei bad kaba sah ka long 15% kaba kynthup ïa ka jingpynbiang bording, ka jingpynbiang um, ka jingpynbha ïa ki sawdong-sawkun nalor kiwei-kiwei.
U la pyntip ruh ba kane ka ‘Mini Secretariat’ ka dei ban long 3 Block, ka West, East bad North Block, bad ïa mynta la lah ban tei ïa ka West Block ha ka jinglut kaba T.20 klur.
Katba na ka bynta ka East Block bad North Block yn leh da ki ‘Phase’ bad hadien ba la buh jingkheiñ biang ka jinglut ka kot sha ka T.29 klur tam. Halor ki 2 tylli ki Block kiba dang sah, na ka liang u MLA u la ïathuh ba u la dep ban pynkymmaw ïa u Myntri Rangbah ka Jylla kumjuh u la rah ruh hapoh ka Assembly bad na ka liang u Myntri Rangbah ka Jylla, u la pyntikna ban mang ha ki bnai ban wan.
Katkum ka jingïohi jong u MLA, ka jingpyndep ïa ka West Block ka long ka jingkyrkhu bad pynsting khamtam ïa ka DC ophis kaba la khapngiah. Ka Ïawmusiang Market Complex ka dei ka jingtei kaba la sahteng la bun-bun snem bad ka Sorkar MDA ka la shim ïa ka rai ban sdang biang ïa ka jingtei ïa ka ha ka jinglut kaba T.25.6 klur.
Ïa u maw nongrim ka jingtei pynbha biang ïa ka Ïew Ïawmusniang la buh da u Symbud Myntri Rangbah ka Jylla, Bah Sniawbhalang Dhar ha ka 13 tarik Nohprah 2024. U Bah Shylla hadien ka jingjurip u pyntip ba ka jingtei ka la kynjoh sha ka 25% tang hapoh 4 bnai ba la sdang ïa ka jingtei.
“Nga dap da ka mynsiem kaba kmen ban ïohi ba ka jingtei, ka la ïaid shakhmat namar kane ka ïew kam dei tang ka jingthrang jingangnud jong ki nong Jowai hynrei jong ka Ri-lum Jaiñtia hi baroh kawei, la ong u Bah Shylla.
Shuh shuh u la khmih lynti ba ka jingtei kan dep hapoh ka por kaba biang khnang ba kan long ka jingkyrkhu bad jingmyntoi ïa ki nongshong ïew bad ki nongshong shnong jong ka thaiñ Jaiñtia.
