Nongpoh, Jymmang 16
Tang khyndiat snem hadien ba ki bor pynïaid distrik ka Ri-Bhoi ki la dep ban khang khyrdep ïa ka khyrdop khrong khajna be-aiñ jong ka Executive Committee (EC) barim ka Khasi Hills Autonomous District Council (KHADC) ha Umdihar, hynrei ha kine ki khyndiat sngi, la mih thymmai biang sa kawei ka khyrdop khrong khajna jong ka KHADC hapoh ka jingïalam ka EC jong ka Voice of the People Party (VPP) ha katei kajuh hi ka jaka kaba don harud jong ka surokbah National Highway 6.
Hadien ba ka la don ka jingujor pyrshah ïa katei ka khyrdop khrong khajna kaba la pynïeng be-aiñ, ki bor pynïaid distrik ka Ri-Bhoi mynta ka sngi sngi, ka 16 tarik u Jymmang, ki la leit ban khang khang tala noh ïa katei ka khyrdop ha ryngkat ka jingsynran lang jong ki bor pulit.
Haba ïoh ban ïakren bad u Deputy Commissioner ka Ri-Bhoi, u Abhilash Baranwal, u la ïathuh ba kino-kino ki tnad treikam Sorkar lane ka KHADC ruh kam lah satia ban buh khyrdop khrong khajna ha ki surokbah National Highway lane ki State Highway ruh kumjuh khlem da ïoh ïa ka jingbit kaba biang na ki bor ba dei khmih. U la ïathuh ruh kumba katei ka khyrdop kaba la pynïeng ha Umdihar ruh kam dei satia kaba la ïoh jingbit na ki bor ba dei khmih, kumta tang mar ïa ïoh jingujor, ki bor pynïaid distrik ki la hiar ban khang tala noh mar-mar ïa katei ka khyrdop.
