Shillong, Jymmang 16
Ka Meghalaya Football Association (MFA) ha ka Sngi Thohdieng ka la pynbna ba la pynjlan ïa ka tarik ba khatduh jong ka Inter-District Transfer 2025 na ka bynta ki nongïalehkai phutbol sa shi taïew, kata haduh ka 24 tarik mynta u bnai.
Ka tarik ba khatduh ban pynpoi ïa ka transfer form ba la dep pyndap bad ban soi hakhmat da ka shlem treikam jong ka MFA ka la buh ban pynlong ha ka 17 tarik, hynrei na ka liang ka synjuk ka la pynjlan ïa ka por sa shi taïew na ka bynta ka jingmyntoi jong ki rangïalehkai kiba don jingthmu ban pynïasoh noh sha ki klob kiba thymmai kiba dei na kiwei pat ki district.
Ïa ka form rong saw blad (pink) dei ban pynpoi sha ka shlem treikam MFA, ïa ka form rong lieh yn bat da ka district association bad ïa ka form rong saw yn bat da ka klob. Yn ym pdiang ïa ki form khlem da pyndait lang bad ki dur jong u nongïalehkai kiba thmu ban pyndep ïa kane ka jingkynriah klob.
Ban pyndep ïa ka jingkynriah klob, ki nongïalehkai ki dei ban soi hi dalade ha ka register ha shlem treikam ka MFA bad ruh ban siew ïa ka bai kynriah klob kaba T.1,000. Ïa kane lah ban leh haduh ka 24 tarik mynta u bnai naduh ka por 3 baje janmiet haduh ka 5 baje janmiet (lait noh ka Sngi U Blei). Shisien ba la soi, ka jingpynkylla ka long kaba kut bad ka MFA kan pynphriang ïa ka thup ba khatduh jong ki nongïalehkai ba la pynkylla sha baroh ki synjuk ïalehkai jong ki district.
