Guwahati, Jymmang:
Ha ka sienjam kaba kongsan ban pynkupbor ïa ki samla jong ka thaiñ Shatei-Mihngi jong ka ri India da ka jingtbit ha ka pule puthi bad ka jinglong ba la pynkhreh ban ïakhun na ka bynta ki eksamin ha ka kam sorkar, ka Assam Royal Global University (RGU) ka la plie paidbah ïa ka Integrated BA bad BSc Prokram kaba nyngkong eh jong ka ryngkat bad ka jinghikai na ka bynta ki eksamin Civil Services.
Ïa kane ka jingthmu kaba thymmai jong ka skulbah RGU yn pyntreikam ha ka jingïatreilang bad ka OnCampus, ha kaba yn ai jinghikai da ka SPM IAS Academy ba pawnam. Ha kane ka bynta, u Dr. AK Pansari, Chancellor jong ka Assam Royal Global University, u la ong, “Kane ka prokram ba la pynïasohlang ka pynpaw ïa ka jingangnud jong ngi ban kmyntiew ïa ki nongïalam ha ka lawei ki ban shakri ïa ka jaitbynriew da ka jinglong ba janai bad ka jingtbit, ban pynkupbor ïa ki samla pule ba kin lah ban sngewthuh ïa ka jinglah jong ki kaba hakhliehduh lyngba ka jingpynkhreh ha ka pule puthi bad ha ka kam kaba ai jingkyrshan.” Haba ai jingkren ha ka jingïalang bad ki nongthoh khubor ba la pynlong da ka RGU hangne hynnin ka sngi, u Prof. (Dr.) AK Buragohain, Chairman, Academic, RGU, u la ong, “Kine ki prokram ki dei kiba la pynwandur na ka bynta ban pynkhreh ïa ki samla pule na ka bynta ki jingïakhun ïa ki eksam UPSC, APSC, bad kiwei pat ki eksam katba ki dang ïaid shakhmat ha ki jingpule jong ki kiba hapoh jong ki Degree. Kine kin sdang naduh u snem jong ka pule-puthi jong u snem 2025-26, ka ban ïaid beit kumba la buh ha ryngkat ka jinghikai ba kyrpang jong ki riew shemphang kiba la tbit.”
U Utpal Kanta, CEO jong ka OnCampus, u la ban jur da kaba ong, “Ka OnCampus ka sngew sarong ban kyrshan ïa kane ka prokram kaba don jingthmu da kaba ai ïa ki tiar Digital ba thymmai bad ka jingïalam ha ka kam, kaba pynlah ïa ki samla pule ban ïoh ïa ki lad jingïarap kiba ïaryngkat kyrdan ha ka pyrthei bad ban pynurlong ïa ki thong jong ki ha ka kam sorkar.” U Satyajit Kumar, Director ka SPM IAS Academy u la ong, “Ka thong jong ngi ka long ban pynlong ïa ki jinghikai kiba hakhliehduh kiba long kiba lah ban ïoh. Kane ka jingïatreilang kan ai mynsiem bad ïalam ïa ki samla ka thaiñ Shatei-Mihngi sha ka jingjop ha ki eksamin UPSC bad APSC.”
Ha kane ka jingïalang bad ki nongthoh khubor la ïoh ruh ïa ka jingkren na ki Director jong ka SPM IAS Academy kiba kynthup ïa u Mridul Mishra, u Chinmoy Bordoloi, u Vivek Khetawat bad u Palash Protim Gogoi. Haba ïakren bad ki lad pathai khubor, u Prof (Dr.) Diganta Munshi uba dei u Registrar jong ka Royal Global University u la ong, “Ki prokram ha ka BA ki kynthup ïa ki jingpule kum ka Sociology, Economics, Public Administration, Political Science, History, Psychology, bad English, katba ki prokram ha ka BSc ki kynthup ïa ka Physics, Mathematics, Chemistry, Geography, Geology, Botany, bad Zoology.”
Man kawei pa kawei ka prokram ka pynïasohlang ïa ka jinghikai na ka bynta ki eksamin sorkar da ka SPM IAS Academy, u la bynrap. Ka SPM IAS Academy kaba la pawnam na ka bynta ka jingjop kaba la pynshisha, ka don ka jingjop kaba 75.48% ha ka APSC 2022 bad 82.55% ha u snem 2023. Ka jinghikai kaba ïahap bad ka UPSC ka don ïa ki klas ba la ïalam da ki riew shemphang kiba tbit, ki jingleh Mock Test ba man ka por, ka jinghikai ba kyrpang, bad ki jinghikai ban tei ïa ki sap ki phong.
