Shillong, Jymmang 16
Ha shwa ka jingïalehkai final jong ka FA Cup pyrshah ïa ka Crystal Palace ha ka sngi Saitjaiñ, u Erling Haaland kum rangïalehkai ka Manchester City u la ong ba kane ka samoi ïalehkai ka long kaba shyrkhei, ka bym sngewtynnad bad kaba eh bha.
Ha kane ka kynti kaba mynta ka City ka dang don ha ka jingartatien ban ïoh rung sha ka Champions League na ka bynta ka samoi ban wan bad ka dangsah sa arsien ïakhun wat la ka la don ha ka kyrdan kaba saw ryngkat 65 poiñ ha kaba ka la tam 2 point ïa ka Chelsea bad ka Aston Villa kiba don ha ka kyrdan kaba san bad hynriew.
“Kane ka samoi ka la long kaba eh. Kam long kaba sngewtynnad ban shah rem ha kiba bun tylli ki jingïalehkai. Ka long ka bym sngewtynnad bad kam long kaba pynkmen. Dei na kata ka daw ba ngi donkam ban ïalehkai bha khnang ban ïoh jingjop. Ka dei ka jingmlien kaba biang eh ban poi sha Wembley bad kaba kongsan beit ban jop ïa ki khusnam. Ngi don ïa ka phainal jong ka FA Cup ban ïalehkai na ka bynta jong ka bad ha ka samoi kaba shyrkhei ngi dang lah ban leh ïa kane,” la bynrap utei u rangïalehkai ba shakhmat na Norway.
“Haba phi la jop saw tylli ki nam lahduh, lada phim lah ban jop san sien kan ym long ka samoi kaba jop. Kita ki dei ki kyndon kiba ngi la buh. Ngim shym la leh bha ha katei ka lympung hynrei ngi dang kyrmen ban rung sha ka Champions League. Ka Crystal Palace ka la long ka kynhun kaba eh ban ïakhun pyrshah. Ngi la ïakhaid ha Selhurst Park bad ki la sdang ban ïalehkai bha ha Etihad. Ka long ka kynhun kaba kynsai bad ka don ruh ïa ki rangïalehkai kiba tbit,” u la bynrap.
Ka City, kaba la jop ïa ka Premier League ha hynñiew tylli ki samoi ba la dep – kynthup saw sien kaba khlem pat ju jia mynno-mynno ruh, ka dang don ka lad ban pyndep ïa kane ka samoi ha ka kyrdan kaba shakhmat lada kan jop ïa ka FA Cup bad ka Club World Cup ka ban wan.
U Manager kane ka kynhun u Pep Guardiola u la ong dang shen ba ma u ne ki nongïalehkai jong u kim dei hok ban ïoh ïa ka khusnam wat lada ki jop ïa ka Club World Cup, kaba don ïa ka khusnam kaba $125 million na ka bynta ka kynhun lahduh. U la ai jingmut ruh ba kan ym don kano-kano ka trophy kaba lah ban kyntiew biang naduh ba ka kynhun ka la aiti noh ïa ka Premier League sha ka Liverpool kaba la tam haduh 18 poiñ bad ban long ruh kum ka lahduh.
