Jowai, Jymmang 16
Ka Jaiñtia Students Union Jowai Circle ka pyrshah jur ïa ka jingthmu ban pynlong ïa ka tamasa ‘Summer Jam Music Festival’ ka ban long ha ka 23 tarik Jymmang hajan ka Civil Hospital Ïalong, West Jaiñtia Hills District namar ka long pyrshah ïa ki kyndon ka Noise Pollution (Regulation and Control) Rules, 2000 jong ka Environment Protection Act, 1986.
Ha u kyrwoh ba la phah da u General Secretary JSU, u la ong ba ka jingpynlong ïa katei ka tamasa hajan ka hospital ka buh jingma ïa ki paidbah ban pynpoi ïa ki nongpang sha ka jaka sumar.
Hadien ka jingïalang bad ka Additional Deputy Commissioner jong ka West Jaiñtia Hills District, ka JSU ka pyntip ba na ka liang ka ADC imat ka khlem ïoh jingtip eiei shaphang katei ka tamasa bad kam don jingtip ruh la ki ïoh ne em ïa ki jingbit kiba biang na ka bynta ban pynlong ïa kane ka tamasa.
Shuh shuh ka JSU ka la ong ba ka jingpynlong ïa ki tamasa hajan ka hospital kan pynthut ïa ka jingsumar ïa ki nongpang bad kan buh jingeh ïa ka jingwan poi ki kali sumar ha ki por ba kyrkieh, kaba lah ban buh jingma ïa ki jingim ki briew.
Ka Civil Hospital Ïalong ka shakri ïa ki nongpang kiba donkam jingïarap ba kyrkieh, bad ka jingpynlong ïa ka tamasa ha kane ka jaka ka lah ban pynslem ïa ka leit ka wan jong ki kali kit nongpang.
Ka JSU Jowai Circle ka pyrshah jur ruh ïa ka tnad Tourism kaba la kyrshan ban pynlong ïa kane ka tamasa khlem da pyrkhat ïa ka jingma jong ka jingkoit jingkhiah ki paidbah bad ka kyntu ïa ki bor synshar District, Meghalaya Pollution Control Board bad bor shnong ban tuklar mardor bad ban pynkynriah ïa kane ka tamasa sha ka jaka kaba biang khnang ba ka jingkoit jingkhiah ki paidbah kan long kaba kongsan tam.
