Shillong, Jymmang 16
Ka National Testing Agency (NTA) ka la mang sa lai tylli ki jaka thoh eksamin hapoh ka Jylla kum shi bynta ban kynthup lang ïa ki samla pule ki ban ïakhun ïa ka eksamin Common University Entrance Test (CUET-UG) 2025.
U Commissioner & Secretary ka tnad pule-puthi ka Jylla, Vijay Kumar Mantri ha ka kyrwoh u la ong ba ki don sa 3 tylli ki jaka thoh eksamin bathymmai kiba la pynkhreh ha nongbah Shillong ba kynthup ïa ka St. Mary’s Higher Secondary School – 70 tylli ki kor kompiwtor (computer nodes), Shillong College – 100 tylli bad Shillong ITI – 29 tylli.
U la ong ruh ba ka Sorkar Jylla ka don hapdeng ka jingïatreilang kaba na ka por sha ka por bad ka NTA ban pynbun ïa ki jaka thoh eksamin na bynta kane ka eksamin kaba hap ban pyndonkam da ki kor kompiwtor.
“Ka NTA ka la shimkhia ïa ka jinglong-jingman bad ka ïatreilang bad ka Jylla ban pyntikna ïa ka jingpyntreikam kaba ïaid beit ïaid ryntih,” ong u Mantri da kaba bynrap ba ïa ki 3 tylli ki jaka thoh eksamin bathymmai la mang biang na bynta ki samla pule kiba ha shuwa, ki la ngat ha ki jaka thoh eksamin kiba sha jngai.
Katkum ka jingtip bathymmai ba la ïohpdiang na ka NTA, baroh ki don 11,309 ngut ki samla pule ki ban ïakhun ïa ka eksamin kaba sdang naduh ka 19 tarik u Jymmang.
Na kine, tang 1,376 ngut ki dei kiba la ngat ha ki jaka thoh eksamin sha Guwahati katba kiwei pat kiba dang sah, la pynbeit ba kin thoh ha ki jaka thoh eksamin kiba don hapoh ka Jylla.
“Kumta, yn ym don samla pule shuh na Meghalaya, mynta, kiba donkam ban leit shabar na Guwahati na bynta ka eksamin CUET-UG. Baroh ki samla pule ki la ngat ha ki jaka thoh eksamin ha Shillong, Tura, lane Guwahati, ka ban sdang naduh ka 19 tarik Jymmang shaneng. Ïa ka jingpynkylla haba ïadei bad ki jaka thoh eksamin la dep pyntip sha ki kyrtong da ka NTA la ka long lyngba ka ’email’ ne mesiej ne baroh ar,” ong u Mantri.
U la ong ba ka Sorkar Jylla ka ïai bteng ban ïeng skhem ha ka jingkular ban pyntikna ba man la ki samla pule na Meghalaya kin ïoh ïa ka lad kaba hok bad kaba suk ban ïakhun na bynta ki eksamin ha ka kyrdan jong ka ri kum ka CUET.
“Ka jingïatreilang kaba ïajan bad ka NTA ka ïai bteng na ka por sha ka por ban pyntikna ïa ka ïaid beit ïaid ryntih bad ka jingjop jong ka eksamin,” u la bynrap.
