Shillong, Jymmang 16
Ka India ka la lah ban pynthikna ban jam sha ka final ha ka lympung ïalehkai SAFF U-19 Cham -pionships 2025 hadien ba la lah ban pynliem noh ïa ka Maldives da 3-0 kol ha ka Sngi Thohdieng ha Golden Jubilee Stadium kaba ha Yupia, Arunachal Pradesh.
Kane ka kynhun kan pynkhreh ban ïaknieh ïa ka nam lahduh pyrshah ïa ka Bangladesh ha ka jingïakhun final ka ban long ha ka Sngi U Blei.
Haba phai sha kane ka jingïakhun semi final, ka India ka la pyrshang ban ïalehkai bha naduh kaba sdang ha kaba ka la ïoh ban thep ar kol ha ka kylla step. Kane ka la wan urlong lyngba u Danny Meitei Laishram uba la ïoh thep kol ha ka minit kaba 14 bad kawei pat na u Omang Dodum ha ka minit kaba 21.
Hapdeng kane ka jingïakhun ki rangïalehkai ka Maldives kim shym la lah ban pynphai wat tang shi kol ruh. Katba ka jingïalehkai ka dang ïaid ka India ka la ïoh biang ïa ka kabu kaba biang ha ka kylla miet na ka bynta ban thep ïa ka kol kaba lai lyngba u Prashant Jajo ha ka minit kaba 65. Haduh kaba kut ka liang pyrshah kam shym la lah ban pynphai bad ka la mad ïa ka jingshah rem.
Haba phai sha kawei pat ka jingïalehkai semi final kaba la long kham ha shwa, ka Bangladesh ka la pynliem noh ïa ka Nepal da 2-1 kol.
Na liang ka Bangladesh la thep da u Ashikur Rehman ha ka minit kaba 28 bad kawei pat na u kapten u Nazmul Huda Faysal ha ka kylla miet. Hynrei ka Nepal ka la lah ban pynphai kylla shi kol lyngba u Sujan Dangol ha shwa ba kan mad ïa ka jingshah rem.
