Guwahati, Jymmang:
U MLA ka Dhing uba dei ruh u nongïalam ka AIUDF, u Aminul Islam, uba la shah kem ha u bnai ba la dep halor ki jingkren kiba ïakynad ha kaba ïadei bad ka jingshah thombor ha Pahalgam, u la shah kem hapoh ka aiñ National Security Act (NSA), la pynthikna ki pulit ha ka sngi Palei.
Kane ka jingleh ka la long hadien tang katto katne kynta ba la ai jamin ïa u da ka ïingbishar ha ka sngi Balang.
U Islam uba mihkhmat ïa ka All India United Democratic Front (AIUDF) na ka Dhing konstitwensi kaba don ha Nagaon distrik jong ka Assam, u la shah kem nyngkong ha ka 24 tarik, Ïaïong arsngi hadien ka jingshah thombor ha Pahalgam namar ba u la kynnoh ba u la kren pynkhihwin ha ka jingïalang ïalap ilekshon Panchayat.
Katkum ka jingong jong u heh pulit ka Nagaon, u Swapnaneel Deka, ka rai ban set ïa utei u nongthaw aiñ hapoh ka NSA la shim namar ki “jingthoh ba la dep” jong u bad ka jingma kaba lah ban mih na ka jingpyllait ïa u ïa ka jingshngaiñ jong ki paidbah.
Ïa kane ka hukum set phatok la pynmih da u Magistrate ka Nagaon distrik u Narendra Kumar Shah, da kaba pynshong nongrim ha ka kaiphot jong ki pulit kiba la kynnoh ba u Islam u ju leh bunsien ïa ki kam kiba pynsniew ïa ka suk ka saiñ paidbah bad ïa ka jingshngaiñ jong ka jylla.
U Islam, u don mynta ha Nagaon Central Jail, katkum ka Section 3(2) jong ka NSA, kaba ailad ïa ki bor pynïaid, ba kin set ïa u briew shimet, haduh shisnem, ha kaba kin bishar bniah man la ka lai bnai.
Hashwa ban shah kem ha ka NSA, u Islam u la shah set ha ki katto katne ki bynta jong ka Bharatiya Nyaya Sanhite (BNS) kiba ïadei bad ka jingbuh jingma ïa ka jinglong ba janai jong ka ri, ka jingpynshlur ïa ka jingïashun para jaitbynriew, bad ka jingkren ïa ki jingkren kiba pynkhihwin kiba lah ban pynthut ïa ka jingsuk paidbah.
Ki pulit ki la kdew ïa ka durkhih kaba la pawnam bha jong ka jingkren jong u Islam ha ka jingïakhih ilekshon, da kaba batai ba ka long kaba “ïalam bakla bad pynkhihwin,” kaba lah ban pynmih ïa ka jingïakynad ha ka imlang-sahlang.
Ïa kane ka mukotduma pyrshah ïa u Islam la buh jingmudui kum ka Nagaon Police Station Case No. 347/25, hapoh ki kyndon jong ka BNS kaba kynthup ha ka 152, 196, 197(1), 113(3), 352, bad 353.
Ki pulit ka Assam ki la pynmih ruh ïa ka jingpynbna ha ka rynsan X (Twitter mynshwa), kaba pynshisha ïa ka jingïoh kem jong u ha ka jingpynbna kaba la saphriang paidbah bad kaba la pynshong nongrim da ka hukum jong ki paidbah.
