Shillong, Jymmang 16
Ïa ka kynhun ïalehkai jong ka India A na ka bynta ka jingïa -lehkai red-ball ban wan sha England la pynbna ha ka Sngi Thohdieng ha kaba ki don katto-katne ngut ki nongïa-lehkai Test ba la ïalehkai teng bad ki nongïalehkai kiba don jingkyrmen ban nangkiew shaphrang.
Kane ka kynhun kaba la ïalam da u Abhimanyu Easwaran, kan ïakhun ar tylli ki jingïakhun ki ban neh saw sngi pyrshah ïa ka England Lions – kaba nyngkong kan long ha Canterbury naduh ka 30 tarik mynta u bnai, bud sa ka jingïalehkai kaba ar ha Northampton naduh ka 6 tarik u Jylliew.
U Yashasvi Jaiswal, Dhruv Jurel, Nitish Kumar Reddy, bad u Ishan Kishan ki dei napdeng ki nongïalehkai ba paw, katba u Shubman Gill bad u B Sai Sudharsan kin ïadonlang ha ka jingïakhun kaba ar. La khmih lynti ba u Gill un shimti ïa ka kam kum u kapten ha ka jingïalehkai Test jong ka India hadien ba u Rohit Sharma u la shongthait noh.
Ka India A kan ïakhun ruh ïa ka jingïalehkai pyrshah ïa ka kynhun ïalehkai (senior) jong ka India ha Beckenham naduh ka 13 haduh ka 16 tarik u Jylliew, kum shi bynta ban pynkhreh na ka bynta ki san tylli ki jingïalehkai Test ha England ka ban sdang ha ka 20 tarik u Jylliew ha Leeds.
U Sarfaraz Khan, Harshit Rana, bad u Akash Deep kin ïadon bynta lang ha kane ka jingleit shim bynta, namar ki dangkhmih lynti ba kin shah jied ban ïoh ïalehkai na ka ri India ha kiwei ki lympung ki dangwan.
Ki rangïalehkai na ka bynta ka India A ki long u Abhimanyu Easwaran (C), Yashasvi Jaiswal, Karun Nair, Dhruv Jurel (VC) (WK), Nitish Kumar Reddy, Shardul Thakur, Ishan Kishan (WK), Manav Suthar, Tanush Kotian, Mukesh Kumar, Akash Deep, Harshit Rana, Anshul Kamboj, Khaleel Ahmed, Ruturaj Gaikwad, Sarfaraz Khan, Tushar Deshpande bad u Harsh Dubey. Katba u Shubman Gill bad u Sai Sudharsan kin wan ïasoh lang ha shwa ka jingïalehkai kaba ar.
