Shillong, Jymmang 18
Ka Meghalaya High Court ha ka Sngi Palei mynshem taïew ka la bthah ïa ka Sorkar Jylla ba kan thaw ïa ka komiti ban pynïaid ïa ki ksew surok kiba wanrah ïa ka jingma kaba khraw ïa ka koit ka khiah jong ki briew.
Ka division bench jong u Chief Justice IP Mukerji bad u Justice W Diengdoh ki la mynjur ïa katei ka hukum, ha kaba la ong ba ïa katei ka komiti dei ban thaw hapoh saw taïew katkum ka Rule 4 jong ka Animal Birth Control (Dogs) Rules, 2001. Ïa kine ki kyndon la thaw da ka Sorkar Pdeng hapoh ka Prevention jong ka sub-section 38 jong ka Prevention of Cruelty to Animals Act, 1960.
Ka kyndon kaba 4 ka ailad ban thaw ïa ka komiti kaba kynthup ïa u commissioner ne u heh jong ka bor synshar shnong ban long kum dkhot ba kyrpang na ka bynta kiwei pat ki dkhot. Kane ka komiti kan treikam katkum ka Rule 5 jong ka aiñ kaba kynthup ïa ka jingpynïaid ïa ki ksew surok, ban kem ruh ïa ki ha kaba leh jai jai, pynkit ha ka rukom kaba biang, ai jaka sah, pynduh khun, ai dawai, bad sumar ïa ki.
Katto katne ki kam jong ka panel ki kynthup ïa ka jingpynsngewthuh paidbah, ka jingpan jingïatreilang bad ka jingïarap pisa, ka jingai jingbthah ïa ki trai ksew bad ki nongri ksew na ka por sha ka por, bad ka jingpynlong ïa ki jingwad bniah halor ka jingdon jong ki ksew ba laitluid.
Ïa kane ka hukum la pynmih da ka High Court hadien ba la mudui ïa ka PIL (Public Interest Litigation) ban shim ïa ki lad ki lynti kiba biang ban tehlakam ïa ka jingma jong ki ksew ba ïaid wir ha ka nongbah Shillong. Hynrei, ka ïingbishar mynta ka la pynïar ïa ka bor treikam jong ka PIL ha baroh kawei ka Jylla Meghalaya. Ka bench ka la ong ba ki commissioner ha ryngkat ka District Council bad ki bor synshar jong ka municipal, ki dei ban pyndep ïa katei ka hukum ha la ki jong ki jong ki district.
