Shillong, Jymmang 18
Ka jingangnud baroh shi katta da ki nongshong shnong ka Lynshing ha Mawkynrew Constituency ban ïoh ïa ka jaka sumar lane ka Sub-Center ka la urlong ha ka 16 tarik u Jymmang, 2025, ha kaba u Bah Banteidor Lyngdoh, MLA u la wan plie paidbah ïa ka kum ka dak ban sdang noh ïa ka jingtreikam na bynta ban ai jingshakri ïa ki paidbah ha katei ka thaiñ.
Ïa kane ka Sub-Center la bei tyngka na ka National Health Mission lyngba ka Pradhan Mantri Ayushman Bharat Health Infrastructure Mission (PM ABHIM) bad la pyndep ban tei ïa ka ha ka mang pynlut kaba long 55 lak tyngka.
Ha ka jingïalang plie ha katei ka sngi, nalor u Bah Banteidor la ïa donlang da u Bah Martle N Mukhim, MDC barim ka Mawkynrew, ka Dr TS Momin, DMHO East Khasi Hills District, ka Dr I Syiem, Medical Officer ka Mawkynrew PHC, u Sirdar, ki nongïalam shnong, ki dkhot VHC Lynshing, ki ophisar lem kiwei pat.
Kane ka Sub-Center ka ban ïarap ïa kiba pang ba shitom kan dei kaba nyngkong eh ban pyndep shna napdeng kiwei pat ha East Khasi Hills District bad kin don shuh ki ban dang shna ha ki katto katne ki shnong kiba hap ha Mawkynrew C&RD Block.
La pynshongkun ïa kane ka sngi da ki jingrwai na ka kynhun ‘Ki Sur Na Nongkyndong’. ki jingshad na ki khynnah bad kiwei pat ki prokram. Haba ai jingkren ha kane ka sngi, u Bah Banteidor u la ong ba na ka liang jong u un ïarap na ka skhim SRWP jong u kum u MLA ban ker kynroh ïa kane ka Sub-Center.
