Shillong, Jymmang 18
U MP ka Rajya Sabha, Dr. W.R Kharlukhi ha ryngkat lem bad u nongai buit u Myntri Rangbah ka Jylla Bah Hamletson Dohling, ki la pynhap pyrda noh ïa ka jingrakhe dap 150 snem jong ka skul Umlyngka Presbyterian Lower Primary ha ka sngi Thohdieng mynshem taïew.
Ïa kane ka shlem ai jingnang jingstad la seng ha u snem 1875. Ha kane ka sngi napdeng ki kongsan la ïadon lang ruh ki Pastor, Tymmen Basan, ki nongïalam Balang, ki Nongïalam Shnong, ki nonghikai bad ki kmie ki kpa.
Haba kren ha kane ka sngi kum u kongsan, u MP u la ong ba ka long ka kam kaba khraw haduh katta katta ba katei ka skul ka la lah ban jam ïa u mawmer ba 150 snem ha ka pule puthi.
Ha kajuh ka por u la ong ruh ba ki mishoneri kiba wan ban seng skul 150 snem mynshwa ha kane ka thaiñ ki dei shisha kita kiba la phah da U Blei ban wanrah jingshai ïa ka shnong ka thaw lyngba ka pule puthi.
Da kaba ai burom ïa ki nonghikai ha kine ki 150 tylli ki snem, u Dr. Kharlukhi u la ong ruh ba wat ïalade ruh u kham sngewtynnad ban pynithuh kum u nonghikai ym kum u MP namar ka kam nonghikai.
Na ka liang u Bah Hamletson u la ong ba lada kren ïa ka 150 snem, um lah satia khlem da phai sha ka mynnor, kumno ba ha ki 150 snem mynshwa ki mishoneri ki poi mutdur ban seng skul ha kine ki jaka.
“Dei ka jingïalam lynti jong U Blei ba la lah ban seng ïa kane ka skul ban pynroi ïa ka jingnang jingstad ha kane ka thaiñ,” u la ong.
Da kaba pynpaw ïa ka jingsngewnguh ïa kane ka skul kaba la shakri ha kine ki 150 snem, u Bah Hamletson u la ong ruh ba ki skul Balang ki la ai ka jingshakri kaba bha tam na ka bynta ka pule puthi ha kane ka Jylla.
“Nga kyrmen ba ka jingïaid lynti jong kane ka skul kan nang janai bad na kane ka skul kin mih ki khlur ki ban shakri ha ka imlang sahlang bad ha ka jaidbynriew.
