Shillong, Jymmang 18
U Secretary ka shnong Dawki, Bah Arjun Pohlong, u la ong ba ki shnong ha khappud ki la sdang ban peitngor ïa ka rung ka mih jong ki nong Bangladesh ka dei naduh ba la khie ka thma pohïing ha Bangladesh.
U la ïathuh ba naduh ba jur ka jingïakhih bad khyllem ka Sorkar jong ka Sheik Hasina, ki la ïoh jingtip ba kiba bun ki nong Bangladesh ki la thmu ban kiew sha India.
U la ai khublei ïa ki pulit kiba la trei shitom ban peitngor ïa ka rung ka mih jong ki briew na Bangladesh bad u la ai khublei ruh ïa ki sengbhalang kiba ju wan ai mynsiem ïa ki na kawei ka por sha kawei pat.
Shuh shuh u la ong ba ka jingpeitngor ïa ka ri Bangladesh ka la sdang naduh mynshem snem bad mynta u bnai haba ka la mih ka jingïakynduh hapdeng ka India bad Pakistan, ki shnong ha khappud ki la peitngor bha ryngkat ka jingïatreilang bad ki pulit.
“Lada ka India bad Bangladesh kim don shuh ka jingïadei paralok, ka jingduhnong ïa ki paidbah namar la thikna ba ka khaïi ka pateng kan hiar,” u la ong.
U la pynpaw ba u don ïa ka jingkyrmen ba shisien ka sngi ka India bad Bangladesh kan dang bteng biang ka jingïadei paralok khnang ban myntoi ki paidbah kiba shong ba sah ha khappud.
Kum ban shu pynkynmaw, ka Sorkar Jylla ka la dep pynjari ïa ka korphiw miet mynshem taïew ha khappud bad ka Bangladesh kaba dang bteng haduh mynta ban tehlakam ïa ka jingrung be-aiñ jong ki ‘riew sniew na Bangladesh hadien ba mih ka jingïakynad hapdeng ka India bad Pakistan.
Haduh mynta ka shnong Dawki bad kiwei ki shnong ba marjan kiba hap ha Amlarem Civil Sub Division ki dang bun ki bym pat ker sainar shiah. Kumta u Bah Arjun u la kyrpad ïa ka Sorkar ba kan ker sainar shiah noh ban ïada ïa ka ri tangba dei ban ker naduh zero line khnang ban ym duhnong ïa ka khyndew ka shyiap jong ki nongshong shnong ka Dawki.
