Shillong, Jymmang 18
Ka kynhun tem jong ki samla Khasi kiba sah ha Bangladesh ki la ïoh ban rwai da ka jingrwai “Nga la rai ba ïa phi ngan ym ieid shuh” jong u Bah R Waroh Pde ha kawei ka prokram ha nongbah Dhaka jong ka ri Bangladesh kaba la long ha ka 13 tarik Ïaïong 2025.
Kane ka kynhun tem jong ki samla Khasi ka dei kaba la ai kyrteng Unity Musical Band na ka shnong Aliacherra, kaba hap ha Habiganj District, Sylhet Division, Bangladesh.
Ïa kane ka kynhun tem la ïalam da u Bah Sumon Lamurong ryngkat ki paralok na katei ka shnong kiba kynthup ïa u Bah Onick Lamin, Augustine Nongpluh, Bishal Pohtam, Rial Surong uba dangrit, uba la ïalam namar uba ïatem lang u Bah Abel Pohtam, uba um don ha shnong.
La seng ïa kane ka kynhun tem ha u snem 2005 hynrei kiba bun kiba seng ki la shongthait bad la shimti da kine ki samla jong ka shnong Aliacherra.
Haba ïoh ban ïakren bad u Bah Sumon Lamurong uba dei u nongïalam ïa kane ka kynhun tem lyngba ka phone, u la ïathuh ba ka don ka prokram ba la pynlong da ka Sorkar Bangladesh ha Dhaka na bynta ki riewlum kaba la donlang ki Garo, Tripura, Chakma.
“Haba ngi la pynkhreh ban rwai saw tylli, ki nongpynïaid ki la ong ban rwai kawei ka jingrwai Khasi namar kane ka prokram ka dei jong ki riewlum bad dei ha kane ka por ngi la ïoh ban rwai ïa ka jingrwai jong u Bah R Waroh Pde kaba ai kyrteng ‘Nga la rai’,” u la ong.
Shuh shuh u la ïathuh kane ka kynhun tem ka la ïoh ban rwai tang ar tylli jingrwai namar ki don sa kiwei ki kynhun tem kiba kham tbit kiba la pynkhreh da ka Sorkar Bangladesh.
U la pyntip ba ki ju rwai beit tang ki jingrwai Bengalee bad Hindi ha Bangladesh kim ju rwai than jingrwai Khasi namar kim da lah ban kynnoh hynrei u sngewkmen haba ki la ïoh ban rwai Khasi ha Dhaka.
U la ïathuh ba ka kynhun tem jong u, ka Unity Musical Band ka dei kaba kham paw napdeng ki riewlum ha Bangladesh namar shisien ba la mih ha rynsan ki paidbah ki kwah ban sngap ïa ka sur ba rwai ma u ha man ki prokram.
