Shillong, Jymmang 18
Halor ka jingïakynad kaba dang shen hapdeng ka India bad ka Pakistan, na ka liang jong u MP ka Tura u Saleng Sangma u la ban jur ïa ka jingdonkam ban pynkhlaiñ ïa ki bor pahara ha khappud da kaba pynpaw ba yn ym lah ban tip kaei ka ban jia hadien habud bad ba ka lah ruh ban mih sa ka jingïakynad hapdeng ka India bad Bangladesh.
U Saleng u la ong ban pynlong ïa ka BSF kum ka kynhun kaba khlaiñ, ka dei ban long kawei na ki mat ba kongsan jong ka Sorkar.
Ha ka sngi Saitjaiñ u Saleng u la ïathuh ha ki lad pathai khubor ba ka Bangladesh ka lah ban long ka jingeh na ka bynta ki jylla ka thaiñ shatei lam-mihngi, haba phai sha ka jinglong jingman kaba jynjar ha khappud sepngi jong ka India, khamtam eh ha kaba ka Dhaka ka pyni ïa ki dak jong ka jingkhluit pyrshah ïa ka Pakistan bad ka “paralok ba jan eh jong ka” ka China.
Haba kdew ba ka jylla Meghalaya bad lai tylli kiwei pat ki jylla ka thaiñ shatei lam-mihngi ki ïasam ïa u pud u sam uba jrong bad ka Bangladesh, u la ong ba u la dep ban pyntip bad thoh sha ka tnat Kam Pohïing ka Sorkar Pdeng (Ministry of Home Affairs) ïa ka jingdonkam ban ker sainar ïa u pud u sam baroh kawei.
“Ar tylli ki ktem jong ki shipai BSF ki dang buh ha Jaiñtia Hills bad Garo Hills, bad ki jaka na ka bynta kane ka jingthmu ki dang wad”, u la ong da kaba kyntu ïa ka Sorkar ba kam dei ban shim sting eiei, khamtam haba peit ïa ka jingwan tuid jong ki mynder ri na Bangladesh bad Rohingya sha Garo Hills.
Shuh shuh u Saleng u la ong ba u la thoh sha ka tnat Kam Pohïing ka Sorkar Pdeng na ka bynta ban pynkhlaiñ ïa ki shipai BSF haba ban jur ïa ka jingdonkam ban pynkloi bad ban pyndap ïa ki kam ba lait ha ka kynhun shipai ba pahara khappud.
Ka jingpyrshang ban wan rung be-aiñ sha India lyngba ka Jylla Meghalaya ka la jur bha ha kine ki khyndiat bnai ba la dep. Katto katne ngut ki nong Bangladesh ki la shah kem ha ki bynta bapher bapher jong ka Jylla katba ki dang pyrshang ban rung ne mih sha India.
Ka jinglong jingman hapdeng kine ar tylli ki ri ka la ktah ïa ka kyrdan kaba thymmai hadien ba ki katto katne ki nongtrei ha Bangladesh ki la kren halor ka jingkwah jong ki ban shimti ïa ka thaiñ shatei lam-mihngi jong ka ri India.
Dang shen, uwei u heh Sorkar ka Bangladesh u la kynthoh ba ka Bangladesh ka dei ban hiar thma ïa kane ka thaiñ shatei lam-mihngi lada ka India bad ka Pakistan ki leit sha ka thma.
