Nongstoiñ, Jymmang 18
Ka shlem trei kam jong ka District Sports Association West Khasi Hills ka la phah ïa ka kynhun lane ka team jong ka West Khasi Hills ba kynthup ïa 68 ngut ki Athlete bad lai ngut ki nongïalam (team Official) jong ka kynhun ban ïashim bynta ha ka State Level Inter School Athletic Meet 2025.
Ka Kong Balarina Syiem DSO West Khasi Hills District ha kajuh ka por kum ka Eastern West Khasi Hills District ka la ong ba katei ka State Level Inter Schools Athletic Meet 2025 kan long ha STC SAI, NEHU Campus, Shillong naduh ka 19 haduh 23 tarik Naitung 2025, ha kaba na ka West Khasi Hills District ki team Official ki kynthup ïa ka Kong B. Kharsyntiew, Kong L. Ryngtong bad u Banjop Wanniang ban ïalam ïa ki 68 ngut ki Athletes kiba la shah jied.
Shuh-shuh ka Kong Syiem DSO ka la ong ruh ba na ka Eastern West Khasi Hills District pat la phah ïa ki 66 ngut Athletes bad lai ngut ki team Official ba kynthup ïa u Bah Wanshailang Lyngdoh, Kong Silda Marbaniang bad ka Kong Thymmei L. Mawnai.
Na ka liang ka Kong Balarina Syiem DSO WKH bad in-charge DSO ka EWKH ka la pynpaw ban ai kitbok kitrwiang ïa baroh ar tylli ki kynhun na ar tylli ki district bad kyrmen ba kin poi sha ka thong jong ka jingjop.
