Guwahati, Jymmang:
Kum shi bynta ban pynrem arsien ïa ka jingkynnoh jong u Gaurav Gogoi ba u don ka jingïadei bad ka Pakistan, u Myntri Rangbah ka Assam u Himanta Biswa Sarma ha ka Sngi U Blei u la kam ba une u MP ka Congress u la leit sha katei ka ri ba marjan halor ka jingkhot jong ka Inter-Services Intelligence (ISI), ka kynhun syntiat jong ka Pakistan.
Haba kren sha ki lad pathai khubor, u Sarma u la kynnoh ba u Gogoi u la leit sha Pakistan ban ïoh jinghikai bad u la ong ba ka dei ka kam kaba khia bha.
“U Gaurav Gogoi u la leit sha Pakistan da ka jingkhot jong ka ISI. Ha ka sien kaba nyngkong, nga kwah ban ong ba u la leit sha Pakistan da ka jingkhot jong ka ISI. Ngi don ïa kata ka kot. U la leit shata ban ïoh jinghikai. U Gaurav Gogoi u la leit shatei hadien ba u la ïohpdiang ïa ka shithi na ka tnat ki kam pohïing jong ka Pakistan. Kane ka long ka bynta kaba la dei ban khmih bniah. Hadien kane, kin sa don bun ki jingpyntreikam ban sa shim,” la ïathuh ka lad phah khubor kumba la kren da u Sarma.
Kane ka jingkren jong u Myntri Rangbah ka Assam ka long hadien shisngi ba u la kyntu ïa u nongïalam ka Liang Pyrshah ha Lok Sabha u Rahul Gandhi ban weng noh ïa ka kyrteng jong u Gogoi na ka thup jong ki saw ngut ki nongïalam Parliament ba la tyrwa da ka Congress na ka bynta ki kynhun jong ka sorkar ban phah sha ki ri bar jylla ban pynshai ïa ka nongrim jong ka India na ka Pakistan halor ka kam lehnoh.
Khlem da pynpaw ïa ka kyrteng jong u MP ka Jorhat, u Myntri Rangbah ka jylla u la pynskhem ba um dei ban shah kynthup ha ki kynhun jong baroh ki seng “ha ka jingmyntoi jong ka jingshngaiñ ka ri”.
U Sarma bad ka BJP ki la kynthoh jur ïa u Gogoi halor ka jingshah kynnoh ka kurim jong u ka Elizabeth Colburn kaba dei ka Britain halor ka jingdonkti bad ka kynhun ISI. Ha ki por ba la dep, u la khot ïa u Gogoi kum u “briew ba pynhapoh jong ka Pakistan”, ha kaba haduh mynta kam pat don kaei kaei ka jingpyntreikam ba long pyrshah ïa u da ka sorkar jong u.
U Sarma u la kynnoh ruh ba u Gogoi u la sah ha Pakistan haduh 15 sngi khlem da pyntip sha ki bor ba dei peit bad u la kynnoh ba ka kurim jong u ka “shim tulop na kawei ka seng treimon sngewbha kaba don ha Pakistan katba ka dang trei ha India”.
U la kam ruh ba ïa ki sakhi sabut halor ka jingkynnoh ba u Gogoi u don ka jingïadei bad ka Pakistan yn sa paw ha ka 10 tarik u Nailur.
