Tura, Jymmang 18
U MDC ka Tura, Bernard Marak u la bteng ban pynpaw ïa ka jingpyrshah halor ka jingthung jong ka Garo Hills Autono-mous District Council (GHADC) ïa u ‘Tax Consultant’, Sumit Kumar Jain Bohra da kaba ong ba kane ka dei ka jingshet kylla ïa ki samla Garo kiba la nang la stad jong kane ka thaiñ.
Ha ka kyrwoh khubor ha ka janmiet jong ka Sngi U Blei, u Marak u la pynpaw ba ka jingthung ïa u ‘Chartered Accountant’ ‘ba thok’ na bynta palat T.8 klur da ka GHADC ka dei ka jingshet kylla ïa ki samla Garo kiba la nang la stad kiba mareh sharum-shaneng ban ïoh ïa ka kam kaba biang.
U la kynnoh ba u Jain u dei uba la pyndep tang ïa ka klas X bad um shym la pyndep wat ïa ka jingpule ba shalor jong u.
“U Jain um shym la pyndep wat tang ïa ka XII, pynban u la pynbiej ïa ki MDC bad ki ophisar bad la thung ïa u kum u ‘Consultant’ da kaba kheiñ ba u dei u ‘Chartered Accountant’ (CA). Ki MDC kiba synshar ha GHADC ki kham lah ïa u bym pat pyndep ïa ka klas XII ban ïa ki hajar ngut ki khynnah Garo kiba la pyndep ïa ka kyrdan pule ‘Graduate’ ha ka shnat pule ‘Commerce’. Ki la shah shet kylla ha ki MDC kiba synshar,” la pynskhem u Marak.
U la bynrap ba, ban long u ‘Consultant’, ka kyrdan pule ‘Bachelor Degree’ ka long ka jingdonkam kaba duna tam, wat la ki kyrdan pule ‘Master Degree’, ki jingpynshisha syrnot bad ka jingshemphang ha ka kam (kaba biang bad kane ka kam) ki lah ban kyntiew shibun ïa ki kyrdan pule ba donkam.
“Ka nongrim kaba skhem ha ka liang ba ïadei kum ka ‘Business Administration’, ‘Economics’, ‘Finance’ lane ka jingpule kaba ïadei bad kane, ka long kaba myntoi, hynrei u S.K. Jain um biang ha kano-kano ka bynta napdeng kine ki jingdonkam,” la kynnoh u Marak.
