Shillong, Jymmang 18
Ka Crystal Palace ka la ïoh ban rah ïa ka nam lahduh kaba kordor bad kaba nyngkong jong ka hadien ba ka la lah ban pynliem ïa ka Manchester City da 1-0 kol ha ka phainal jong ka FA Cup ha ka sngi Saitjain.
Kane ka kynhun ba la ïalam da u Oliver Glasner kum u coach ka la lamkhmat ha ka kylla step ha ka madan Wembley ha London ha kaba u Eberechi Eze u lah ban pynkhih jar nongkong na ka bynta ka Crystal Palace.
Ka Manchester City wat la ka la ïakhun tyngeh ha shi lynter jong ka jinglehkai hynrei kam shym la la lah ban pynseisoh na kiba bun tylli ki kabu ba ka la ïoh, kynthup ruh ïa ka penalty ba la pynlehnohei na u Omar Marmoush.
Ka Crystal Palace ka la lam khmat ïa ka jingïalehkai da ka kol ha ka minit kaba 16 ïa kaba ki nongkyrshan jong ka ki la long mlien ban ïohi katba u Glasner u dang lamkhmat ïa ka klob.
Ka Manchester City ha ka jingshisha ka la long trai khlieh naduh kaba sdang jong ka jingïalehkai bad wat haba ka la shah thep 1-0 ruh ka dang ïai pynsohsat ïa ki nongap baka ka Cyrstal Palace. Kane ka jingïathom ka Manchester sha pyrshah ka kol jong ka Palace ka la sei soh haba u Bernardo Silva u la shah pynur ha u Tyrick Mitchell hapoh ka kud sawdong jong ka kol ka Crystal Palace.
U Marmoush u la mih shakhmat ban shut ïa ka penalty na ka bynta ka Manchester City hynrei u nongap kol ka Palace, u Dean Henderson u la lah da kaba suk ban kyndat shabar ïa ka bol da kaba rynsied sha ka liang kadiang.
Ka kylla step ka la kut noh haba ka Manchester City kam shym la lah ban pynphai ïa ka kol ba la thep ka Palace ha ka minit kaba 16 jong ka jingïalehkai.
Ha ka kylla miet ruh wat la ka Manchester City ka la ïaleh katba lah ban ïoh thep kol hynrei ki rangïalehkai ka Palace kim shym la ailad bad ki la ïada tyngeh ïa ka ka kol haduh kaba kut bad ban ïoh rah syndon ïa ka nam lahduh.
