Shillong, Jymmang 18
Ha ka por 11 duna eiei mynstep jong ka 18 tarik u Jymmang, 2025, ka la don ka jingpatrong paidbah ïa ar ngut ki bar jylla sha thanat Madanriting halor ka jingkynnoh ba ki la shim pisa da kaba kular thok ban ai kam ha Assam Regiment Centre (ARC) ha Happy Valley.
Hadien kane, na ka liang ki bor pulit ki la sei ïa uwei na ki ban leit leh ïa ka Medical Test bad ha katei ka por la don uwei pat u bar jylla uba ithuh-ithaw bad kitei ar ngut uba pyrshang ban ïada pynban ïa ki bad kane ka la pynbitar ïa kiba shah thok kiba la khynñiat bad kyrdem ïa u.
Ka jingkyrdem paidbah ka dei kaba la i shyrkhei haduh katta katta bad shu donbok ba ki don ki pulit CRPF kiba la ïada bad pynrung kloi ïa u shapoh ka thanat. Ha ka jingïaleh ban ïada ïa utei bar jylla ba un lait na ka jingshah kyrdem, uwei u pulit ruh u la shah ktah kti lang ha kiba shah kular thok.
Haba wad jingtip ïa ka daw, la shem ba kitei ar ngut ki bar jylla ki dei ba la tip kyrteng kum u Valmiki Amar bad u Sujan Sharma na Happy Valley. Kine ki briew naduh u bnai Rymphang mynta u snem ki wad briew bad pan pisa haduh 5000 tyngka ban pynrung kam ha ARC.
La ong ba ha kane ka step ki la lum ïa ki briew kiba ki la shim pisa ha Happy Valley bad ong ba ki kam kim don shuh bad kumta ka la pynlong ïa kiba kwah kam ban pan noh ka pisa bad mih ruh ka jingïania kaba jur.
Don napdeng kiba shah kular ai kam, ki la leit wad jingtip na ARC ha kaba la shem ba ym don satia kum kita ki kam ba lait ha ARC bad kumta kane ka la pynbitar ïa ki bad mar-mar ki la patan ïa kitei ar ngut sha thanat.
La ong ba kiba shah thok ki don palat ïa ka 500 ngut eiei bad kine ar ngut ki la shna da ka WhatsApp Group kaba la ai kyrteng Civil Workers bad ki briew kiba ki la shim pisa ban ai kam.
Shuh shuh la ong ba na ka liang ki briew kiba shah thok ki dang ap sah hakhmat katei ka thanat haduh ka por janmiet da ka jingkhmih lynti ban ïoh jubab eiei na ki bor pulit.
Shuh shuh ka khubor ka la ong ba utei u briew uba shah kyrdem kat haduh ba pyllait ïa kane ka khubor u la don sha jaka sumar.
Kiba shah thok ki don palat 500 ngut eiei bad don napdeng kiba la siew hapdeng ka 500 tyngka haduh 5000 tyngka sha kitei ar ngut naduh ki bnai sdang mynta u snem (2025) bad ki dei ruh kiba sah kylleng ka Ri Lum Khasi Jaiñtia.
Katto katne ki samla ki la hylla ba ki kwah ïa ka pisa kaba ki la ai sha kine ar ngut bad kwah ruh ba ki pulit kin pynthikna ba kitei ki briew kin pynphai ïa ka pisa jong ki.
