New Delhi, Jymmang 18
U lehnoh jong ka kynhun Lashkar-e-Taiba, Razaullah Nizamani, uba ju khot sin kum u Abu Saifullah, uba dei u nongsuhbuit ba sha lyndet jong ka jingthombor ïa ka Headquarter ka RSS ha u snem 2006, u la shah pynïap noh ha ki ‘riew kieng atiar ki bym lah ban ithuh saita ha Sindh Province jong ka Pakistan, ong ki heh ophisar.
U Nizamani, uba la ïoh ïa ka jingïada bor pahara na ka Sorkar Pakistan, u la mih na ïingsah jong u, ha Matli, Sindh, hynne mynsngi bad u la shah siat ha ki ‘riew thombor, hajan kawei ka jaka ba hap jam na shiliang-sha-shiliang, la ong ki ophisar.
Nalor ka jingsuhbuit haba ïadei bad ka jingthombor ïa ka Headquarter jong ka Rashtriya Swayamsevak Sangh (RSS) ha Nagpur, une u snar lehnoh ka Lashkar u la don bynta ruh ha ka jingthombor ïa ka Indian Institute of Science ha u snem 2005 ha Bengaluru bad ka jinghiar thma ïa ka CRPF ha Rampur ha u snem 2001.
