Khliehriat Jymmang 18
Saw tylli ki trok kiba ïeng ha phyllaw jong ka karkhana pynmih dewbilat jong ka Star Cement ki la shah thang ha u paidbhur bym lah ban ithuh ha ka janmiet jong ka Sngi U Blei ka 18 tarik Jymmang.
Kane ka jingjia ka la jia hadien ka jingshah ïuh kali jong uwei u khynnah na ka shnong Lumshnong ha East Jaiñtia Hills District bad khlad noh hashen.
La ïathuh ba u paidbhur uba la khie bitar halor kane ka jingjia, u la tur sha katei ka karkhana jong ka Star Cement bad ha kaba ki la thang ïa ki saw tylli ki trok kiba don ha kane karkhana.
Ka khubor kaba ïoh lum na katei ka shnong, ka ïathuh ba hadien katei ka jingshah ïuh jong utei u samla, ka la mih ka huri-hura kaba jur ha kaba u paidbhur u la tur sha karkhana Star Cement bad ban thang ïa kitei saw tylli ki trok.
Ka jinglong-jingman ha kane ka jaka kam long shuh kaba shngaiñ bad ka lah ban mih ruh ka jingkynad kaba jur.
